БИШКЕК, 7-дек. — Sputnik. ТҮРКСОЙ 2018-жылды "Айтматов жылы" деп жарыялады. Бул туурасында Маданият, маалымат жана туризм министрлигинен билдиришти.
Мындай чечим Түрк маданиятынын эл аралык уюмунун (ТҮРКСОЙ) Казакстандын Түркстан калаасында өткөн 35-жыйынында кабыл алынган. Ага ылайык, 2018-жыл ичинде бул уюмга кирген өлкөлөрдө Чыңгыз Айтматовго арналган көптөгөн иш-чаралар өткөрүлөт
Жыйынга маданият, маалымат жана туризм министри Султан Жумагулов да катышып, ТҮРКСОЙдун башкы катчысын алмаштыруу сунушун киргизген.
"Кыргызстан ТҮРКСОЙдун башкы катчысын шайлоого жана кызматын ээлеп туруу мөөнөтү жөнүндөгү уюмдун келишимине өзгөртүү киргизүүнү сунуштады. Атап айтканда, бир эле өлкөнүн өкүлү башкы катчылык кызматты көп жылдардан бери ээлеп келиши алгылыксыз экени белгиленди. Натыйжада талкуулардан кийин Кыргызстандын сунушун изилдеп жана аны 2018-жылы боло турган жыйынга алып чыгуу боюнча жумушчу топ түзүү чечими кабыл алынды", — деп айтылат маалыматта.
2018-жылы 25 жылдык маарекесин белгилегени турган ТЮРКСОЙ Азербайжан, Казакстан, Кыргызстан, Түркия жана Түркмөнстан сыяктуу түрк тилдүү өлкөлөрдүн башын кошуп турат. Түрк элинин жалпы материалдык жана маданий эстеликтерин сактоо, өнүктүрүү жана келечек муундарга өткөрүп берүү үчүн түрк элинин кызматташтыгынын башкы максаты катары жарыялаган.
