18:55 30 Бугу 2017
Түз эфир
Кыргыз Республикасынын Эл баатыры Сабира Күмүшалиеванын архивдик сүрөтү

Эл артисти Сабира Күмүшалиева жөнүндө кызыктуу беш факты

© Фото / Александр Федоров
Маданият
Кыскача шилтеме алуу
Мирбек Сакенов
Кыргыздын көркөм өнөрү, белгилүү инсандары жөнүндө фактылар (64)
418280

Бүгүн белгилүү сахна чебери, Кыргыз Республикасынын Эл баатыры Сабира Күмүшалиеванын туулган күнү. Буга байланыштуу Sputnik Кыргызстан Сабира Күмүшалиева жөнүндө кызыктуу 5 фактыны сунуштайт.

Эгер тирүү болгондо 100 жашка чыкмак. Улуу актриса өзүнүн сахнада жараткан образдары, адамдык өзгөчө асыл сапаттары менен элдин эсинде түбөлүккө сакталып калган. 

1. Кудайдан берилген талант ээси. Сабира Күмүшалиева 1917-жылы 19-мартта азыркы Бишкек шаарындагы Төкөлдөш айылында туулган. Үй-бүлөдөгү жалгыз кыз мектепти аяктагандан соң, педагогикалык институттун даярдоо курсунда билим алып, мектепте мугалим болуп иштеген. Ал Кыргыз мамлекеттик академиялык театрына 16 жашында келип, Касымаалы Жантөшевдин "Карачач" драмасындагы Карачачтын ролун аткарган. Анын чыгармачылыгындагы эске сала кетчү жагдай, Күмүшалиева эч бир жерден актёрдук кесипке окуган эмес..

2. Эл арасындагы "Умай Эне". "Сабира апа, сиз кыргыздардын Умай Энесисиз. Ошондуктан сизден абдан суранам, жүзгө чыгыңыз, юбилейиңизди өткөрөлү", —деп президент Аскар Акаев куттуктоо жазган. Ошондон баштап эл ичинде Умай Эне аталып калган. Актриса аталган ысымды 1990-жылы тастыктаган. Ошто кыргыз-өзбек коогалаңы башталганда "Ала-Тоо" аянтында Ошко барабыз деп чогулган миңдеген жаштарды бийликтин суранычы менен барып токтотуп калган.

3. Элүү жашында 14 жашар баланын ролун аткарган. Күмүшалиева 70 жылдан ашык театр, кинодо эмгектенген. Бул мезгил аралыгында100дөн ашык түрдүү образдарды жараткан. Алардын арасында кайгылуу, күлкүлүү оң жана терс образдар бар. Узак убакыт бою Бексултан Жакиевдин "Атынын тагдырындагы" Оңолкандын ролун ойногон. Андан сырткары, "Уркуя", " Ак кеме", "Бакайдын жайыты", "Лифти бар үйдөгү тепкичтер" жана " Кызыл алма" өңдү көптөгөн фильмдерде тартылган. Эң кызыгы элүү жашында 14 жаштагы Кычан Жакыповду ойногон.

4. Ыйлаганын башкаларга көргөзчү эмес. Сабира Күмүшалиева эл алдында эч качан көз жашын төккөн эмес жана балдарын дагы ошого үйрөткөн. Актриса балдарына "адам көз жашын төгүп башка адамдын маанайын түшүрүп, кайгыртпашы керек" деп тарбиялаган. Ал жашоосунда күчтүү, токтоо болуп, эмоциясын кармаганга аракет кылчу экен. Жада калса, кийин эки уулу каза болуп калганда элдин көзүнчө ыйлабаганга аракет кылган. Кызы Нуржамалдын эскерүүсү боюнча баласы каза болгон учурда да, кайгысын эч кимге көргөзбөй бөлмөсүнө бекинип ыйлаганын учурлары болгон.

5. Балдардын көзүнчө урушпаган ата-энелер. Сабира Күмүшалиева менен Муратбек Рыкулов 38 жыл чогуу өмүр кечирип, төрт баланы тарбиялап өстүргөн. Өмүрлүк жарлар эч качан балдардын алдында урушчу эмес. Эгер кандайдыр бир тил табыша албай калган жагдайлар пайда болгондо балдарына көргөзбөөгө аракет кылышчу. Муну кийин балдары Муратбек Рыскуловдун айдоочусунан билип калган. Көрсө, жубайлар балдарына үлгү болуу үчүн авто унааны айдатып шаардын четине барып урушуп алып, эч нерсе болбогондой кайра үйүнө кирип келишчү экен.

Маалыматтар Сабира Күмүшалиеванын кызы Нуржамал Рыскуловадан алынды.

Тема:
Кыргыздын көркөм өнөрү, белгилүү инсандары жөнүндө фактылар (64)

Тема боюнча

Кийинки муун: залкар талант Бакен Кыдыкееванын баркына жете албадык
Белгилер:
өмүр, факты, актриса, Сабира Күмүшалиева, Кыргызстан

ЭҢ МААНИЛҮҮ