БИШКЕК, 21-июн. — Sputnik. Соңку убакта Өзбекстанда коронавирусту массалык түрдө жугузуп алгандар катталып жатканын Sputnik Өзбекстан маалымат агенттиги жазды.
Бул жарандардын коопсуздук чараларын сактабастан көп кишинин катышуусунда той жана майрамдык кечелерди уюштуруп жаткандыгына байланыштуу экендиги айтылат.
Ошондой эле ташкенттик аял төрт күндүн ичинде эки баласын үйлөгөнгө жетишкен. Эреже сакталбай, бир келини жана тойго келген 12 адам коронавирус жуктуруп алган. Ошондой эле бейтаптар менен байланышта болгон ондогон киши тест тапшырып, обсервацияга жаткырылган. Бул боюнча дагы эпидемиологиялык иликтөө жүрүп жатканы айтылат.
Соңку маалыматтар боюнча, Өзбекстанда коронавируска кабылгандардын саны 6216га жетти. Тилекке каршы, оору 19 кишинин өмүрүн алды.
