БИШКЕК, 21-июн. — Sputnik. Түркмөнстандын тышкы иштер министри Рашид Мередов июлдун башында өлкө Дүйнөлүк саламаттыкты сактоо уюмун тосуп алууга даяр экендигин билдирди. Бул тууралуу ал маалымат жыйында айтканын Anadolu түрк маалымат агенттиги жазды.
Мередов Түркмөнстан коронавируска кабылбаган мамлекеттердин арасында экендигин баса белгилеген.
"Өлкөдө COVID-19дун жоктугунун себеби ТИМ чек араларды өз убагында жапканында эмес, саламаттык сактоо системасынын өнүккөндүгүндө", — деген Мередов.
Белгилей кетсек, Дүйнөлүк саламаттыкты сактоо уюму май айында эле Түркмөнстанга барууну пландап, бирок ал ишке ашпай калган.
Жон Хопкинс университетинин сайтындагы маалыматка караганда, 21-июнь күнү COVID-19 дүйнө боюнча 8 770 629 адамга жугуп, анын 464 039у каза тапты. Дартка каршы азырынча бир дагы өлкө вакцина иштеп чыга элек.
