БИШКЕК, 26-фев. — Sputnik. Түркмөнстандын президенти Гурбангулы Бердымухамедов эл аралык аялдар күнүнө карата өлкөдөгү аялзатына акчалай белек берүүгө буйрук берди. Бул тууралуу Sputnik Казакстан агенттиги жазып чыкты.
Маалыматка ылайык, ар бир иштеген аял майрамга карата 40 манаттан (11 долларга чукул) акча алат.
"Мындан сырткары 8-мартка карата акчалай белектер пенсия жана мамлекеттен жөлөк пул алган аялдарга, аспирантура, докторантура, клиникалык ординатурада окугандарга, студенттерге, мектеп окуучуларына жана балдар бакчаларында тарбияланып жаткан кыздарга да берилет. Акчалай белек берүү салтанаты 1- марттан тарта башталат", — деп жазылат маалыматта.
Түркмөнстандын мурдагы президенти Сапармурат Ниязов 8-мартты совет доорунан калган майрам катары санап, аны 21-22-мартта Нооруз майрамы менен бирге майрамдоону буйруган.
Эл аралык 8-март аялдар күнү Түркмөнстандын календарына майрам күн катары 2008-жылы мурдагы өлкө башчынын көзү өткөндөн кийин киргизилген.
