БИШКЕК, 29-апр. — Sputnik. Бириккен Араб Эмирликтери ОПЕК жана ОПЕК+ уюмдарынан чыгарын жарыялады. Бул туурасында РИА Новости жазды.
Чечим 1-майдан тартып күчүнө кирет. WAM агенттиги мындай кадам мунай өндүрүү саясатын кайра карап чыгууга байланыштуу кабыл алынганын жазды. БАЭ мунай өндүрүшүн акырындап көбөйтүүнү пландап, бул процесске жоопкерчиликтүү мамиле кыларын билдирген. Чечим уюмга мүчө мамлекеттер үчүн күтүүсүз болду.
БАЭнин ОПЕК жана ОПЕК+ альянсынан чыгуу чечими стратегиялык мүнөзгө ээ жана узак мөөнөттүү экономикалык көз карашка негизделгенин аталган эмирликтин Тышкы иштер министрлигинин Стратегиялык коммуникациялар департаментинин директору Афра ал-Хамели да айтты.
"Бириккен Араб Эмирликтери бүгүн Мунай экспорттоочу өлкөлөрдүн уюмунан (ОПЕК) жана ОПЕК+ альянсынан чыгуу чечимин жарыялады, бул чечим 1-майдан тарта күчүнө кирет", — деп айтылган.
Уюмдун маалыматына ылайык, мартта Абу-Даби мунай өндүрүшүн суткасына 3,4 миллион баррелден 1,89 миллионго түшүргөн. Бул Жакынкы Чыгыштагы жаңжалга байланыштуу экени белгиленген.
ОПЕК 1960-жылы түзүлгөн мунай экспорттоочу өлкөлөрдүн уюму жана дүйнөлүк баага таасир этүү үчүн өндүрүш квоталарын көзөмөлдөйт. Уюмга Алжир, Иран, Ирак, Сауд Арабиясы, Венесуэла жана башка өлкөлөр кирет.
Ал эми кеңейтилген форматтагы ОПЕК+ уюмуна Россия, Казакстан, Мексика жана башка бир катар өлкөлөр кирип, мунай өндүрүшүн жөнгө салуу боюнча биргелешкен чараларды ишке ашырып келишет.