БИШКЕК, 28-апр. — Sputnik. Кыргызстанда облустардын ордуна 20 округ түзүлсө, мамлекеттик башкаруу жөнөкөйлөшүп, элдин жашоосу ыңгайлуураак болот. Мындай пикирди саясат таануучу Алибек Мукамбаев билдирди.
Ал демилге ишке ашса округдарда 350-400 миң калк болуп, ар биринин бюджети жана бардык керектүү мамлекеттик органдары жайгашкан борбору (ири шаар) болот деп эсептейт.
Калктын маселелеринин 90-95 пайызы округ деңгээлинде чечилип, өкмөт же президентке кайрылуу зарылдыгы азаят. Азыр айыл тургундары облус борборуна жетүү үчүн 4-5 саат жол жүрсө, жаңы система менен 1,5-2 саатта маселени чечип, кайтып келүү мүмкүн болот. Округдарда өз ооруканалары, укук коргоо органдары жайгашып, келечекте жогорку окуу жайлар да ачылышы мүмкүн.
Буга чейин президент Садыр Жапаров өлкөдө облус жана райондор жоюлуп, ордуна 20 чакты округ түзүү пландалып жатканын айткан.