БИШКЕК, 10-апр. — Sputnik. УКМКнын үч кызматкери ишкерлерден опузалап акча алууга айыпталып кармалды. Атайын кызмат өздүк курамды тазалоо иштери жүрүп жатканын билдирди.
Маалыматка ылайык, кармалган кызматкерлер ишкерлерге кысым көрсөтүп, аларды акча төлөөгө мажбур кылган коррупциялык схема түзгөн деп шектелүүдө. Бул фактылар боюнча кылмыш иши козголду.
Анын алкагында 9-апрелде А.К., А.А. жана К.Д. аттуу учурдагы кызматкерлер кармалып, УКМКнын тергөө абагына киргизилди. Мындан тышкары, ишкерлерге текшерүү иштерин жүргүзгөн мамлекеттик органдардын дагы үч кызматкери колго түшүрүлгөн.
Белгилей кетсек, 7-апрелде парламентте башкы прокурор Максат Асаналиев УКМК кызматкерлеринин үстүнөн 386 арыз түшкөнүн, Аскер прокуратурасы тарабынан коррупциялык багытта, кызматтык кылмыштарга байланыштуу 18 иш козголуп, тергелип жатканын билдирген эле.