БИШКЕК, 7-апр. — Sputnik. Бала сатууга аракет кылып кармалган жарандарга сот өкүмү чыкты. Бул тууралуу УКМКнын маалымат кызматы билдирди.
Ага ылайык, айыпталуучулар Кыргызстандын аймагынан балдарды мыйзамсыз чыгаруу боюнча туруктуу канал уюштурууга шектелип 2024-жылдын сентябрь айында кармалган. Бул факт боюнча Кылмыш-жаза кодексинин 167-беренеси ("Балдарды соодалоо") менен иш козголгон.
"Тергөө аныктагандай, Казакстандын жараны А.А. Израилдин А.Б. аттуу жаранынан акча алууга келишип, Кыргызстандын С.С. аттуу жаранынан жашы жете элек үч бала сатып алган. Андан соң аларга адеп-ахлаксыз жана диний ритуалдык мүнөздөгү аракеттер жасалып, балдарды жылаңачтап сүрөткө тартып, социалдык мессенджерлер аркылуу өлкө сыртында жашаган үчүнчү жактарга жөнөткөн", — деп айтылат маалыматта.
Мындан тышкары, аталган кылмыштуу топ Д.К. аттуу кыргыз жаранынын жашы жете элек эки баласын толук камкордукка алууга уруксат алып, аларга карата да ушундай эле аракеттер жасалган. Чогултулган кылмыш ишинин материалдары Бишкек шаарынын Биринчи май райондук сотуна жөнөтүлгөн.
Сот үстүбүздөгү жылдын 12-мартында айыпталуучуларды күнөөлүү деп таап, мүлкүн конфискациялаган. Казакстандын жараны А.А. 12 жылга жана кыргызстандык С.С. 11 жылга эркинен ажыратылган.