Кыргызстандын президенти Садыр Жапаров БУУнун Башкы Ассамблеясынын 80-сессиясынын жалпы дебаттарында сүйлөп, Газадагы согушту токтотууга, Афганстандын тоңдурулган активдерин кайтарууга чакырганын анын маалымат кызматы билдирди. Мамлекет башчы дүйнө Газа тилкесиндеги аёосуз кагылышуулардын айынан эбегейсиз жоготууларга учурап жаткан Палестина элине тилектеш болушу керектигин белгилеген.Ошондой эле Палестина 1967-жылдагы чек аранын негизинде көз карандысыздыкка ээ болушу керектигин айткан. Андан тышкары, Афганстандын тоңдурулган активдерин кайтарууга чакырып, аталган өлкөнү эл аралык изоляциялап, каржылык жардамсыз калтыруу туура эместигине токтолду. Ал Батыш өлкөлөрү тарабынан тоңдурулган 9 миллиард доллардан ашык акча афган элине кайтарылып, каражатты инфраструктураны калыбына келтирүүгө, жергиликтүү банк системасын колдоого, айыл чарбасын өнүктүрүүгө жумшоо туура болорун кошумчалаган.
Мурдагы мамлекеттик катчы Сүйүнбек Касмамбетов Борбордук шайлоо комиссиясына мүчө болду. Жогорку Кеңеш бүгүн анын талапкерлигин колдоп берди. Депутаттар Касмамбетов менен бирге Кабылбек Мамбетаиповдун талапкерлигин да жактырды. Кечээ күнү парламенттин тармактык комитети да колдоп берген. Белгилей кетсек, аталган эки талапкер тең президенттин квотасы менен шайланышты.
Көзөмөл камераларынан улам өлкөдө ачылбай калган оор кылмыш жок. Бул тууралуу ИИМдин коомдук коопсуздук кызматынын жетекчисинин орун басары Алмаз Батырбаев Sputnik агенттигинин маалымат борборунда өткөн брифингде билдирди. Анын айтымында, "Коопсуз өлкө" долбоору ишке киргенден бери көчөлөрдө жана адамдар көп чогулган жерлерде кылмыштуулук менен мыйзам бузуу учурлары азайган. Учурда системага үч миңден ашык камера туташтырылып, анын 1,5 миңден ашыгында адамды жүзүнөн таануу функциясы бар."Өлкөдө ачылбай калган оор кылмыш жок деп ишенимдүү айта алам. Бардык киши өлтүрүү, каракчылык, тоноо жана башка оор кылмыштар видеобайкоо системасынын жардамы менен толук ачылууда", — деди Батырбаев биздин маалымат борбордогу иш-чарада.
АКШ президенти Дональд Трамп Украинанын колдон чыгарган жерлерин кайтарып алуу мүмкүнчүлүгү тууралуу жар салып жатып, аталган өлкөнү жарга кептеди. Бул туурасында америкалык жөө аскерлердин чалгын кызматынын отставкадагы офицери, америкалык аналитик Скотт Риттер айтканын РИА Новости жазды. Шейшемби күнү Ак үйдүн кожоюну Киев Евро Биримдиктин колдоосу жана НАТОнун финансылык көмөгү менен алдырып жиберген жерин кайра тартып алууга мүмкүнчүлүгү бар деген пикирин билдирген эле. "Ал Украинаны жарга кептеди. Муну менен катар эле европалык экономиканы талкаланууга түрттү, ал эми НАТОну өзүнүн айткандарын аткарбаган же ишенимди актабаган, жөн гана "сөз жүзүндөгү жолборско" айланууга дагы салымын кошту", — деген серепчи. Риттер америкалык лидер эми бул жаңжалдан четтеп кетүүнү чечти деген пикирин билдирген.