БИШКЕК, 4-сен. — Sputnik. Үстүбүздөгү жылдын сентябрь айынын башында биргелешкен ыкчам-издөө иш-чараларынын натыйжасында Москва шаарында оор кылмыштары үчүн бир нече жолу соттолгон Кыргызстандын жараны кармалды. Бул тууралуу ИИМ билдирди.
Ведомствонун маалыматы боюнча, мурда мамлекеттер аралык издөө жарыяланган Б.У.К. криминалдык чөйрөдө Узун Улан деген ат менен белгилүү жана ИИМде уюшкан кылмыштуу топтун активдүү мүчөсү катары каттоодо турат.
"Ал Камчыбек Асанбектин (Камчы Көлбаев — ред.) эң жакын жана ишенимдүү адамы болуп, жеке коопсуздугун камсыз кылган. Кылмыштуу тирештерге катышып, кылмыш дүйнөсүнүн казынасын толтуруу максатында ишкерлердин фирмаларын, кыймылсыз мүлкүн тартып алуу менен алектенген", — деп айтылат маалыматта.
Б.У.К. 2019-жылы Бишкек шаарында чет өлкөлүк ишкердин өзгөчө ири өлчөмдөгү мүлкүн ээлеп алууга жана каракчылыкка айыпталууда. Шектүү Бишкекке жеткирилип, тергөө амалдары жүргүзүлүп жатат.