БИШКЕК, 9-сен. — Sputnik. Россияда Кыргызстандын миграциялык өкүлүчүлүгү ачылып, кийинки жумадан тарта иштей баштайт. Бул туурасында эмгек, социалдык камсыздоо жана миграция министринин орун басары Нурдөөлөт Базарбаев билдирди.
Анын айтымында, өкүлчүлүктө 11 адам иштейт, эки-үч күн мурда алар кызматка бекитилди.
"Миграциялык өкүлүчүлүк Москва шаарында иш алып барат. Министр Кудайберген Базарбаевич өкүлчүлүктүн жетекчисин бул жактан дайындап, ушул жекшемби күнү өзү менен кошо Россияга ала барат", — деди Базарбаев.
Жыйында депутат Жанар Акаев мурда миграциялык өкүлчүлүк Россиянын Федералдык миграциялык кызматы менен түз сүйлөшүп, көп маселелерди чечип келгенин белгиледи. Азыр элчиликтин алдына кошуп койгондуктан укуктары кыскарып калганын эске салды.