БИШКЕК, 11-авг. — Sputnik. Россиянын Воронеж облусунда Советтер Союзунун Баатыры Чолпонбай Түлөбердиевдин эрдигинин 80 жылдыгына арналган салтанаттуу иш-чаралар өткөрүлдү. Бул тууралуу КР президентинин маалымат кызматы билдирди.
Президенттик аппараттын тышкы саясат бөлүмүнүн башчысы Муратбек Азымбакиев Садыр Жапаровдун куттуктоосун окуп берди.
“Биз Россия жетекчилигинин Улуу Ата Мекендик согуштун баатыры Чолпонбай Түлөбердиевдин элесин сактоого кылдат көңүл буруп жатканын жогору баалайбыз. Воронеж облусунун Лиски шаарындагы Баатырлар аллеясында Түлөбердиевдин бюсту ачылып, эстеликтер орнотулду. Ал эми Селявное жана Кировское айылдарына эстелиги тургузулган”, — деп айтылат кайрылууда.
Согуш жылдарында 365 миң кыргызстандык фронтко аттанып, алардын үчтөн бири согуш талаасында курман болуп же дайынсыз жоголгон. 150 миңден ашык адам сыйлыктарга ээ болгон.
“Кыргыз элинин уулдарынын ысымдары өлкө тарыхында алтын тамгалар менен жазылган. Алардын арасында Советтер Союзунун Баатыры наамына ээ болгон Чолпонбай Түлөбердиев да бар”, — деп баса белгиледи мамлекет башчысы.