БИШКЕК, 29-май — Sputnik. НАТОнун чыгышты карай кеңейүү боюнча саясаты Украинадагы россиялык атайын операциянын башталышына себеп болду. Бул тууралуу Кытайдын Элдик бошотуучулар армиясынын отставкадагы улук полковниги Чжоу Бонун айтканын South China Morning Post басылмасынан алып РИА Новости жазды.
"Украинадагы чатак НАТОнун Россиянын эскертүүсүн тоготпой жана кеңейүүсүн уланта бергендигинен улам келип чыкты", — деген Бо.
Офицер чыңалуунун мындан аркы ырбашы өзөктүк куралды колдонууга алып келген аскердик чатакка айланышы мүмкүндүгүн белгилеген.
Бо андыктан НАТО бардык жоопкерчиликти өзүнө алып, кандай гана кырдаал болбосун Россияга биринчилерден болуп өзөктүк сокку уруудан баш тартышы керектигин айтат. Андан сырткары Москванын биринчи сокку уруудан баш тартуу шарттарында НАТОнун чыгышка карай кеңейтүүсүн токтотуу, Европадагы коопсуздуктун жаңы механизмдери боюнча сүйлөшүүлөрдү демилгелөө, аймакта адаттагы жана атомдук куралдарды чектөө жаатында келишим түзүүсү маанилүү экендигин белгилеген.
Россия Украинада атайын операциясын 24-февралда баштаган. РФтин Коргоо министрлиги Куралдуу күчтөр соккуну аскердик инфраструктура жана аскердик күчтөргө уруп жаткандыгын, 25-мартта негизги тапшырманын биринчи этабын аткаргандыгын, тагыраагы, Украинанын согуштук мүмкүнчүлүгүн азайткандыгын билдирген. Алар башкы максат — Донбассты бошотуу экендигин айтышты.