БИШКЕК, 17-май — Sputnik. Россиядан чет өлкөгө акча которууга коюлган чектөөнүн көлөмү беш эсе жогорулатылды. Бул туурасында өлкөнүн Борбордук банкы билдирди.
"Россиянын резиденттери жана достук мамиледеги өлкөлөрдүн резидент эместери россиялык банктагы эсебинен жеке эсебине же чет өлкөдөгү жеке жактарга бир айдын аралыгында 50 миң доллар же ушул суммага барабар башка валютада акча которо алат. Буга чейинки чек 10 миң доллар болчу", — деп айтылат маалыматта.
Деген менен акча которуу системасы аркылуу (эсеп ачпай эле) резиденттер жана достук мамиледеги өлкөлөрдүн резидент эместери мурдагыдай эле 5 миң доллар же ушул суммага барабар башка валютада акча жөнөтө алат.
"Ошол эле учурда Россияда эмгек жана жарандык-укуктук келишим боюнча иштеген жеке жактар — достук мамиледеги өлкөлөрдүн резидент эместери кошумча дагы россиялык эсептерден чет өлкөгө рубль жана башка валютада маянасы же кызмат көрсөтүүдөн тапкан кирешесине барабар каражат которо алат. Мындан тышкары, эсеп ачпай эле жөнөтсө да болот", — деп жазылган башкы банктын маалыматында.
Финансылык орган мындай чектөө 2022-жылдын 30-сентябрына чейин коюлганын кошумчалады. Каражат которууда курс Россия банкы тарабынан бектилген расмий валюта боюнча эсептелмекчи.