БИШКЕК, 13-апр. — Sputnik. 13-апрель саат 18:00гө карата Лейлек районундагы дарыгерлердин жалпы практикалык борборуна чек ара чырынан жабыркаган дагы үч адам кайрылган. Бул тууралуу Саламаттык сактоо министрлигинин маалымат кызматы кабарлады.
Билдирмеге караганда, жалпысынан ооруканага чек ара чырынан жабыркаган алты киши жеткирилген. Анын ичинен экөө биринчи медициналык жардам алган соң амбулатордук шартта дарыланууга жөнөтүлгөн. Учурда ооруканада төртөө жатат. Алар:
Э.М., 23 жашта (аскер кызматкери). Октон жаракат алган, абалы орточо оор;
О.З., 30 жашта (аскер кызматкери). Октон жаракат алган, абалы орточо оор;
Т.А., 20 жашта (аскер кызматкери). Бутун ооруксунтуп алган, абалы канааттандырарлык;
Б.Т., 50 жашта. Октон жаракат алган, абалы канааттандырарлык.
"Бардык бейтаптар тиешелүү медициналык жардамды алып, дарыланууда. Мындан тышкары, Лейлектеги медиктер эвакуация болгон элге консультация берип, медициналык жардам көрсөтүшүүдө. Бүгүн 150 адамды көрүштү, көбү аялдар менен балдар", — деп айтылат маалыматта.
Эске салсак, 12-апрелде тажик чек арачылары кыргыз чек арачыларынын эскертүүсүнө карабай Кыргызстандын аймагына кирип, жыйынтыгында ок атылган. Бирок эки тараптын Чек ара кызматтарынын өкүлдөрүнүн сүйлөшүүсүнөн кийин атышуу токтотулганы, кырдаал туруктуу экени айтылган. Кийинчерээк кайрадан атышуу болуп, тажик тарап Кыргызстандын Достук айылын миномёт менен аткылай баштаганы кабарланган. Тажик тарап кыргыз айылын миномёт менен атуусун токтоткон соң Баткен районунун Радар-1 жеринде турган Кыргызстандын чек арачыларына ок чыгара баштаган.
13-апрелге караган түнү Лейлек районуна караштуу Кыргыз-Встреч аймагында кыргыз-тажик чек арасындагы абал талкууланып, тараптар чатак чыккан жерден кошумча каражаттарын алып кете баштаган.
Тараптар эки ирет жолугушуу өткөрүп, бир катар макулдашууларга келишкен.