БИШКЕК, 21-мар. — Sputnik. Кыргызстанга расмий сапары менен келген Сауд Аравиянын тышкы иштер министри Файсал бин Фархан Аль-Саудду министрлер кабинетинин төрагасы Акылбек Жапаров кабыл алып, тараптар кызматташууну күчөтүү боюнча сөз кылышты. Бул тууралуу өкмөттүн маалымат кызматынан билдиришти.
"Сауд Аравия Падышалыгы — араб дүйнөсүндөгү эң маанилүү өнөктөштөрдүн бири. Кыргызстан сиздер менен тажрыйба алмашуу, инвестиция, энергетика жана жаңыланып туруучу энергия булактары тармактарында кызматташууга кызыкдар. Ошондой эле айыл чарба продукциясын экспорттоого басым жасагыбыз келет", — деди Жапаров.
Ал эми Сауд Аравиянын тышкы иштер министри Файсал бин Фархан Аль-Сауд ар тараптуу кызматташуу идеясын колдой турганын билдирип, бул жылы кыргыз-сауд бизнес-форумун өткөрүү демилгесин жактырганын кошумчалады.
Белгилей кетсек, Аль-Сауд КРдин тышкы иштер министри Руслан Казакбаевдин чакыруусу менен Кыргызстанга алгачкы жолу келди.
Жаңылыктарды кыска жана ыкчам окугуңуз келсе Telegram каналыбызга катталыңыз.