Дүйнөдө коронавирус илдети курчуп жатканда Бишкектеги дарыканаларда медициналык бет каптар дээрлик түгөнүп калды. Sputnik Кыргызстан агенттигинин кабарчысы борборду кыдырып, бет каптардын тартыштыгы күч экенине күбө болду. Калган дарыканалардын сатуучулары маскалар эчак түгөнгөнүн айтып беришти.
— Бет каптар калбай калдыбы?
— Ооба, түгөнгөн.
— Канчадан бери жок?
— Бир жумадай болуп калды.
— Жаңылары качан алып келинет?
— Билбейбиз.
Саламаттык сактоо министрлигинин Дары-дармек менен камсыздоо департаментинин жетекчисинин орун басары Руслан Акматов бет каптарды сырттан алып келүү боюнча сүйлөшүүлөр күнүгө жүрүп жатканын билдирди.
"Тилекке каршы, Кыргызстанда бет каптар өндүрүлбөйт. Азыр бизге эки компания чакан бет кап тигүүчү цехтерди ачуу ниетин билдирип кайрылды. Учурда бет каптарды Өзбекстан жана Пакистандан импорттоо маселеси чечилип жатат", — деди Акматов.
Эске сала кетсек, январдын аягында Кыргызстан медициналык бет каптарды сыртка чыгарууга тыюу салган. 28-февралга карата берилген маалымат боюнча, ушу тапта Кыргызстанда коронавирус катталган учур жок.