БИШКЕК, 7-янв. — Sputnik. "Социалдык ипотека" долбоорунун алкагында "Керемет Банк" ачык акционердик коому 2020-жылы дагы насыя берет. Бул тууралуу президент Сооронбай Жээнбеков менен Улуттук банктын төрагасы Толкунбек Абдыгуловдун жолугушуусу учурунда маалым болду.
Президенттин маалымат кызматынын билдирмесине караганда, 2019-жылдын 30-майынан 31-декабрына чейин "Керемет Банк" ААКы жалпы суммасы 1 054,2 миллион сомго 723 насыя бөлүп берген. Ал насыялар Кыргызстандын аймактарында иштеген бюджеттик уюмдардын кызматкерлерине бөлүнүп берилген.
Эске салсак, мамлекеттик ипотекалык компаниясы бюджеттик мекемеде иштебеген, аймакта жашаган кардарларга да үстөк пайызы төмөн ипотекалык насыя бере баштаганын жар салган. Аны алуунун жол-жобосун Sputnik Кыргызстан агенттиги даярдаган материалдан окусаңыз болот.