БИШКЕК, 20-фев. — Sputnik. Юрист Кайрат Осмоналиев депутат Тазабек Икрамовго "Билим берүүнүн отличниги" төш белгиси мыйзамсыз берилгенин айтып, бул боюнча Коопсуздук кеңешинин катчысына кат жолдогон болчу.
Белгилей кетсек, Икрамовдун сыйлыгы ведомстволук сыйлык катары эсептелинет.
Биз өлкө башчынын сыйлыктар тууралуу соңку төрт Жарлыгына саресеп салдык. Анда ар бир эл өкүлү кайсы эмгеги үчүн сыйланганы жазылган. Тизмеден депутаттарды да учуратууга болот.
Эмгек сиңирген ишмерден экөө
Документ 2017-жылы 14-ноябрда кабыл алынган. Жарлык тууралуу кыскача: "Өлкө аймактарынын социалдык-экономикалык өнүгүшүнө жана экономиканы бекемдөөгө кошкон жигердүү салымы үчүн".
- "Айыл чарбасына эмгек сиңирген кызматкер" ардактуу наамы — Айтмамат Назаров ("Кыргызстан" фракциясы);
- "Өнөр жай тармагына эмгек сиңирген кызматкер" ардактуу наамы — Марат Аманкулов (КСДП).
Сыйлангандардын катарында Иса Өмүркулов жана Искендер Матраимов бар
Жарлыкка 2017-жылы 20-ноябрда кол коюлган. Мазмуну: "Кыргызстандын социалдык-экономикалык өнүгүшүнө олуттуу салым кошкону жана социалдык реформаларды, ошондой эле ишиндеги профессионалдуу жетишкендиги үчүн".
- "Достук" ордени — Анвар Артыков (КСДП), Алтынбек Сулайманов ("Бир Бол" фракциясынын лидери);
- "Даңк" ордени — Иса Өмүркулов (КСДП лидери), Бакирдин Субанбеков ("Бир Бол");
"Мамлекеттик кызматтын эмгек сиңирген ишмери" ардак наамы — Искендер Матраимов (КСДП);
- Кыргызстандын Ардак грамотасы — Дамирбек Асылбек уулу ("Кыргызстан"), Мирлан Бакиров ("Өнүгүү — Прогресс"), Бакытбек Жетигенов (КСДП), Аида Исмаилова ("Республика — Ата-Журт"), Евгения Строкова (КСДП) жана Эмил Токтошев ("Ата Мекен").
Кыргызстандын бирден-бир ири мамлекеттик сыйлыгы
Жарлык 2018-жылдын 30-августунан бери ыйгарылып келет. Мазмуну: "Өлкөнүн социалдык-экономикалык, интеллектуалдык жана руханий потенциалынын өнүгүшүнө кошкон салымы жана ишиндеги профессионалдык жетишкендиктери үчүн". Ошондой эле Эгемендик күнүнүн урматына ыйгарылат.
- III даражадагы "Манас" ордени — Мыктыбек Абдылдаев ("Бир Бол");
- "Даңк" медалы — Автандил Кулбакаров (КСДП);
- "Эмгек сиңирген дарыгер" ардактуу наамы — Альфия Самигуллина (КСДП);
- "Эмгек сиңирген экономист" ардактуу наамы — Гүлшат Асылбаева ("Өнүгүү — Прогресс");
- "Мамлекеттик кызматка эмгек сиңирген ишмер" ардактуу наамы — Айнуру Алтыбаева (КСДП);
- "Саламаттык сактоонун эмгек сиңирген кызматкери" ардактуу наамы — Алмазбек Токторов ("Кыргызстан");
Белгилей кетсек, "Манас" орденинен кийин "Кыргыз Республикасынын Баатыры" наамы гана бар.
Сыйлык алгандардын арасында "уялчаак" депутат Жолдошбаев бар
Жарлыкка былтыр 31-декабрда кол коюлган. Кыскача түшүндүрмөсү: " Өлкөнүн социалдык-экономикалык, интеллектуалдык жана руханий потенциалынын өнүгүшүнө кошкон салымы жана ишиндеги профессионалдык жетишкендиктери үчүн берилет".
- "Даңк" медалы — Абдумуктар Маматов ("Ата Мекен");
- "Өнөр жай тармагына эмгек сиңирген ишмер" ардактуу наамы — Азамат Арапбаев (КСДП), Камчыбек Жолдошбаев ("Өнүгүү — Прогресс");
- Ардак грамота — Алмазбек Акматов ("Бир Бол"), Калдарбек Баймуратов ("Республика — Ата-Журт") жана Кубанычбек Нурматов ("Кыргызстан").