БИШКЕК, 5-дек. — Sputnik. Бишкектин Түштүк магистралындагы веложолдун курулушу аяктады. Бул тууралуу мэриядан кабарлашты.
Билдирмеге караганда, "Бишкекасфальтсервис" ишканасы Түштүк магистралдын эки тарабына тең жөө адамдар менен велосипедчендер үчүн Байтик баатырдан Садырбаев көчөсүнө чейин жол курду.
"Жөө адамдар үчүн зона 7,2 чакырымды түздү. Тротуар менен веложолдун туурасы 4,5 метрди түзөт. Эки чети жарыктандырылып, 200 отургуч жана 400 таштанды челек коюлду. Мындан сырткары, Ала-Арча дарыясынын үстүнө жөө адамдар өтүүчү көпүрө курулду", — деп айтылат маалыматта.
Бул иштерди аткарууга шаардык бюджеттен 55 миллиондон ашык сом сарпталган.