БИШКЕК, 3-окт. — Sputnik. Экс-президент Алмазбек Атамбаев Бишкек ТЭЦиндеги авария тууралуу макала жазды. Бул тууралуу КСДП партиясынан маалымдашты.
Мурдагы ажо макаланын башында 2010-жылы апрель окуяларынан кийин энергетика тармагындагы абал тууралуу жана аны жакшыртуу үчүн кандай чаралар көрүлгөнүнө токтолгон. Ал ошондой эле Бишкекте электр энергиясын маал-маалы менен өчүрүү көйгөйүн жаңы ТЭЦ куруу менен, же аны жаңылоо менен гана чечүүгө мүмкүн болгонуна токтолгон.
Атамбаев ошондой эле ТЭЦтин жабдууларынын эскилиги эбак жеткенин, эртеби кечпи авария болмоктугун айткан.
"2010-жылга карата эле ТЭЦтеги жабдуунун эскилиги 70-75 пайызды түзгөнүн эске сала кетейин. Ири авария болсо кыйроого алып келмек. Ошондуктан мен президент катары ЖЭБди реконструкциялоо ишин создуктурбоону талап кылган элем. Ошо 2013-жылда президенттин аппараты, өлкөнүн өкмөтү жана ЖКнын депутаттары ыкчам иш-аракеттерди жүргүзбөгөндө, ЖЭБди реконструкциялоону баштоо, Кытайдын чиновниктери эскерткендей, жогеле дегенде, 2015-жылга дейре толук бир жылга кечикмек. Демек, ЖЭБдин негизги бөлүгү 2017-жылдын күзүндө эмес, быйылкы 2018-жылдын күзүнө араң бүтмөк", — деп жазган Атамбаев.
Ал андан сырктары, реконструкциялоо иштери өткөн жылдын күзүнө чейин аяктабаганда техногендик катастрофа болмоктугун айтып, ошол кыйроонун алдын алгандар бүгүн камакта отурганына токтолгон.
Мурдагы президенттин макаласын толук түрдө КСДП партиясынын сайтынан окуңуздар.