Өлкө боюнча 59 миң бүтүрүүчүнүн 44 миңден ашыгы ЖРТ тапшырды. Бул тууралуу Кудайберди Кожобеков Sputnik Кыргызстан радиосунун таңкы эфиринде маек куруп жатып билдирди.
Анын айтымында, абитуриент баллына эмес, жөндөмүнө жараша кесип тандаганы туура.
"Быйыл 59 миң бүтүрүүчүдөн 44 миңи жалпы республикалык тестирлөөнү тапшырды. Тестке кирбеген окуучулар орто билим берүүчү окуу жайлардан окуусун улантса керек. Анткени бүгүнкү күндө жаштар аз убакыттын ичинде билим алып, иштеп кете ала турган кесиптерге кызыгууда. Ал эми ЖОЖго тапшырам деген 44 миңден ашык абитуриент баллына эмес, кызыгуусуна жана жөндөмүнө жараша кесип тандаса, ийгиликтүү адамдардын катарын толуктайт деп ойлойм", — деди Кожобеков.
Ал ошондой эле бул жылы республика боюнча абитуриенттер үчүн жалпы 5705 гранттык орун каралганын кошумчалады.
