Жаш үй-бүлө төрөткө олуттуу даярданышы керек. Бул тууралуу Салтанат Назаралиева Sputnik Кыргызстан радиосунун таңкы эфиринде маек куруп жатып билдирди.
Анын айтымында, үй-бүлө мүчөлөрү төрөткө байланыштуу сабактарга катышуусу зарыл.
"Төрөткө эне да, үй-бүлө мүчөлөрүнүн да даяр болушу шарт. Мисалы, кош бойлуу келин боюнда барында семирип кетүүсү нормалдуу көрүнүш экенин билип, өзүн жакшы сезиши керек. Аял кош бойлуу кезде канча килограмм кошорун жолдошу, жакындары да алдына ала билиши зарыл. Төрөткө даярдануу учурунда аял керектүү витаминдерди ичип, үй-бүлө курган кыз-жигиттер атайын төрөт боюнча өтүлгөн сабактарга катышып, олуттуу даярданышы керек. Мындан сырткары, кайсы жерде төрөп, келиндин жанында кимдер болорун тактоо зарыл", — деди Назаралиева.
Ал кош бойлуу келиндин өзү, же операция жолу менен төрөй турганын алдын ала билүусү абдан маанилүу экенин кошумчалады.
