Суукта организмге кантип кам көрүү керек. Дарыгердин кеңеши
© Sputnik / Елена Яковлева
Жазылуу
№9 үй-бүлөлүк дарыгерлер борборунун директорунун эне жана баланын ден соолугун коргоо боюнча орун басары Диляра Искакова кыш мезгилинде иммунитетти бекемдөөнүн жолдорун айтып берди.
Кыш мезгилинде организм күзгө салыштырмалуу турукташып калат. Ошентсе да сасык тумоо же башка оорулар козголбошу үчүн ага жардам берип турушубуз зарыл. Бул тууралуу Диляра Искакова Sputnik Кыргызстан радиосунун эфиринде маек куруп жатып билдирди.
Суукта организмге кантип кам көрүү керек. Дарыгердин кеңеши
Анын айтымында, кышында иммунитетти сактоо үчүн уйку режимине, туура тамактанууга жана психологиялык абалга көңүл буруу керек.
"Чоңдор да, балдар да дайым бир убакта уктап, бир убакта ойгонууга аракет кылышы керек. Ага шарт туура келбесе жок дегенде 8 саат уктоо маанилүү. Бул убакыт аралыгында организм толук калыбына келет. Ошондой эле туура тамактануу абдан маанилүү. Анткени бул мезгилде күндүн нуру аз болгондуктан Д витаминин жетишпестиги көп байкалат. Аны негизинен тамак-аш жана эшикте сейилдөө аркылуу алууга аракет кылууну сунуштайбыз. Эгер анда да толукталбаса, дарыгердин кеңеши менен кошумча витаминдерди кабыл алууга болот. Кышында мандарин, курма, анар, алма, лимон жана жашыл чөптөр организм үчүн пайдалуу. Мындан тышкары, эт азыктарын да жешибиз керек. Алар гемоглобиндин деңгээлин сактоого жардам берет. Д витамини, гемоглобин төмөндөсө, организм илдеттерге туруштук бере албай, адам ооруй берет", — деди Искакова.
Ал ошондой эле кошумча витаминдерди дарыгердин кеңешисиз кабыл алуу ден соолукка зыян алып келиши мүмкүн экенин эскертти.
