Бишкек шаардык кеңеш “бир көчө — бир аталыш” демилгесин жактырды
19:20 07.10.2025 (Жаңыртылды: 09:20 08.10.2025)
Жазылуу
БИШКЕК, 7-окт. — Sputnik. Бишкек шаардык кеңеши 7-октябрда өткөн сессияда борбор калаанын географиялык объектилерин кайра атоо тартибине өзгөртүүлөрдү киргизүү жөнүндөгү токтом долбоорун жактырды.
Документке 35 депутат добуш берди.
Долбоордун максаты — көчөлөрдүн кайталанган жана бөлүктөргө бөлүнгөн аталыштарын жоюу, шаардын дарек системасын жөнөкөйлөтүү.
Буга чейин көчөлөрдүн аталыштарын төмөнкүдөй кылып өзгөртүү сунушталган:
Ч. Айтматов проспекти жана Манас көчөсү — Айтматов проспекти;
М. Фрунзе көчөсү, Дэн Сяопин проспекти, Чүй проспекти жана Шабдан баатыр проспекти — Чүй проспекти;
Фучик жана Васильевский тракт көчөлөрү — Манас көчөсү;
Лев Толстой жана Путепроводная көчөлөрү — Шабдан баатыр көчөсү;
Абдрахманов, Байтик баатыр жана Элебесов көчөлөрү — Абдрахманов көчөсү;
А. Токомбаев, Масалиев жана Жайыл баатыр көчөлөрү (Түштүк магистраль) — Жайыл баатыр проспекти;
Курманжан датка жана 7-Апрель көчөлөрү — Курманжан датка көчөсү;
Чортеков жана Кривоносов көчөлөрү — А. Масалиев көчөсү;
Жаш Гвардия бульвары жана Махатма Ганди көчөсү — И. Айдарбеков көчөсү;
Селекция жана Муромск көчөлөрү — Махатма Ганди көчөсү;
Ленин көчөсү, Жеңиш проспекти жана Жибек Жолу проспекти — Жибек Жолу проспекти;
Анкара жана М. Горький көчөлөрү — Анкара көчөсү;
К. Тыналиев жана Иманкулов көчөлөрү — К. Тыналиев көчөсү;
Окраинная, Көк-Сай, Курманалиев, Набережная жана Береговая көчөлөрү — Дэн Сяопин проспекти;
И. Раззаков көчөсү — Чортеков көчөсү;
Виноградная көчөсү — Л. Толстой көчөсү;
Н. Гоголь көчөсү — Ч. Иманкулов көчөсү;
Ленская жана Юбилейная көчөлөрү — А. Токомбаев көчөсү.
Белгилей кетсек, вице-мэр Азамат Кадыров документ коомдук талкууга чыккандан кийин Түштүк магистралды Жайыл баатыр эмес, Аалы Токомбаев деп атоону сунуштагандар болгонун айтты. Ал шаардык кеңеш кандай деп чечсе, көчө ошондой аталарын кошумчалады.
