Путин Эрдоган менен иран-израиль жаңжалын талкуулады. Маанилүү учурлар
19:21 16.06.2025 (Жаңыртылды: 15:58 24.06.2025)
© Sputnik / Сергей Гунеев
/ Жазылуу
БИШКЕК, 16-июн. — Sputnik. Россия жана Түркия президенттери Владимир Путин менен Режеп Тайип Эрдоган телефондон сүйлөшүп, Иран менен Израилдин ортосундагы кагылышууну талкуулашты. Бул тууралуу РИА Новости жазды.
Пикир алышуунун негизги учурлары:
Эрдоган Израилдин Иранга болгон кол салуусунан кийин башталган зомбулук жалпы региондун коопсуздугуна коркунуч жаратарын белгиледи. Анын айтымында, Израилдин премьер-министри Биньямин Нетаньяху башында турган өкмөттүн аракети эл аралык системага түз коркунуч болуп эсептелет;
Түркия лидери Анкара кагылышуунун алгачкы күндөрүнөн тарта эле Израилдин Иранга чабуулун токтотууга багытталган дипломатиялык демилгелерди жактап келерине көңүл бурду. Иранга байланыштуу маселени жөнгө салуунун жалгыз жолу — дипломатия, тараптар сүйлөшүүнү болушунча эртерээк башташы керек;
Путин түрк тарапка Россия менен Украинанын түз сүйлөшүүлөрүн уюштуруп бергенине ыраазычылык айтты;
лидерлер Жакынкы Чыгыштагы абалдын кескин курчушуна тынчсыздануусун билдиришкен;
Путин менен Эрдоган иран-израиль жаңжалынан адамдар өлүп жатканын, кагылышуунун кесепети жалпы регион үчүн оор болорун белгилешти;
РФ президенти Россия Украина менен туткундарды алмашуу сыяктуу сүйлөшүүлөрдүн бардык шартын кынтыксыз аткарып жатканын айтты;
эки өлкөнүн лидерлери согуштук аракеттерди токтотуп, Ирандын өзөктүк программасына байланышкан маселелерди саясий-дипломатиялык жол менен гана жөнгө салууну колдой тургандыктарын белгилешти. Тараптар Жакынкы Чыгыштагы кырдаал курчуган маалда дайым байланышта болуп турууну макулдашышты.
Эскерте кетсек, 13-июнь түнү Израилдин Коргонуу армиясы (ЦАХАЛ) масштабдуу аскердик операциясын баштап, анын алкагында Куралдуу күчтөрү Ирандын өзөктүк программасынын объектилерине сокку урууда. Чабуулдар Тегеранды да камтып, Ирандын Куралдуу күчтөрүнүн Башкы штабынын жетекчиси, Ислам революциясынын сакчылар корпусунун командачысы жана илимпоздор мерт болгон. Ошондой эле Натанз, Фордо шаарларындагы өзөктүк объектилер жана башка аскердик жайлар бутага алынганы айтылды.
Бул окуядан кийин Ирандын жогорку лидери аятолла Али Хаменеи элге кайрылуу жасап, Израилдин чабуулдарын "кылмыш" деп атап, бул режимди "коркунучтуу тагдыр" күтүп турганын билдирди.
Ислам революциясынын сакчылар корпусунун маалыматына караганда, Иран жооп иретинде "Чындык убадасы — 3" аталышындагы операцияны баштап, Израилдеги аскердик объектилерге сокку урган.
