Аткезчилик товардын наркы 100 миң сомго жетсе конфискациялоо сунушталды
20:07 22.03.2025 (Жаңыртылды: 11:12 23.03.2025)
© Sputnik / Рамиль Ситдиков
/ Жазылуу
БИШКЕК, 22-мар. — Sputnik. Аткезчилик товардын наркы 100 миң сомго жетсе конфискациялоо сунушталды. Мыйзам долбоорун Жогорку Кеңештин депутаты Миргүл Темирбаева иштеп чыккан.
Учурда товарлардын наркы 500 миң сомго жеткенде гана конфискация болот. Эл өкүлү мындан төмөн көрсөткүч болсо 5 500 сом эле айып салынганы контрабанданын уланышына шарт түзүүдө деп эсептеп, статистиканы келтирген.
2024-жылга карата Башкы прокуратуранын маалыматына ылайык, контрабанда боюнча 92 иш козголсо, анын ичинен:
46 иш сотко жөнөтүлгөн;
14 иш токтотулган;
12 иш иликтөөдө;
20 иш убактылуу токтотулган.
"Башкача айтканда, козголгон иштердин жарымы гана сотко жеткен. Мындан тышкары, көптөгөн укук бузуулар боюнча кылмыш иши козголбостон, жөн гана протокол түзүү менен чектелүүдө. Маселен, Лейлек РИИБдин тергөө кызматынын маалыматына ылайык, 1-январдан 18-мартка чейин 25 укук бузуу катталган. Анын ичинен төрт факт боюнча гана кылмыш иши козголуп, сотко жөнөтүлгөн. Калган 19 учурда алынган товарлардын баасы жетишсиз болгондуктан алар Бажы кызматына өткөрүлүп, айып пул катары 5 500 сом гана салынган", — деп жазылган долбоордун негиздемесинде.
