Мамытов: Трамптын айрым аракеттери убадаларына карама-каршы келүүдө
© Sputnik / Асель Сыдыкова
Жазылуу
Мамлекеттик башкаруу академиясынын жаңы экономика боюнча илим-изилдөө кафедрасынын жетекчиси, экономист Улукман Мамытов "Экономикалык панорама" уктуруусунун алкагында АКШнын алдыдагы экономикалык саясатына сереп салды.
Дональд Трамп ааламдашуу саясатын жактабаган киши. Демек, алдыда Американын экономикалык саясаты өлкөнү кубаттандырууга багытталат. Ал ушул көз карашты колдогондордун добушу менен президенттикке келди. Эми берген убадаларын аткарууга белсенет, бирок азыркы аракеттеринде башаламандык бар. Мындай пикирин Улукман Мамытов Sputnik Кыргызстан радиосуна маек куруп жатып билдирди.
Анын айтымында, учурдагы Америка 1950-жылдардагыдай кубаттуу эмес.
"Азыркы Америка экономикалык жактан бир топ алсырап турат. Буга чейинки президенти Жо Байдендин саясаты ааламдашууну жактап, ресурстарын терең изилдөөлөрсүз чачып, бир убакытта бир нече фронтто ойногонго аракет кылганынын кесепети өлкөнү ушул абалга кептеди. Азыркы президент Дональд Трамп дал ушул маселени жөнгө салам деп америкалыктарга убада берди. Бийликке келери менен мурдагы администрациянын бир нече чечимин жокко чыгарды. Бирок чөгүп бараткан кемени калыбына келтирүү машакаттуу иш да. Ал канчалык бизнесмен болбосун, бул оңойго турбайт. Андыктан азыр Трамп айрым учурларда башаламан саясат жүргүзүп жаткандай. Мисалы, ошол эле мигранттарга болгон мамилени айтсак. Аларды массалык кетирүү менен АКШда эмгек рыногунда таңсыктык жаралат. Мындай учурларда адис жетишсиздиги күчөп, талап бар жерде айлык акы жогорулайт. Жогорулаган айлык инфляцияны күчөтөт. Инфляция күчөгөн жерде пайыздык чендер көбөйөт. Жыйынтыгында акчанын куну өсөт. Ал эми мындай саясат Трамптын тарапташтары болгон өндүрүшчүлөргө туура келбейт. Өндүрүш өсүшү үчүн банктагы пайыздык чендер төмөн, акчанын куну аз болгону дурус. Экинчи маселе, Трамп жаңы энергетика булактарын эмес, баягы эле күйүүчү майды колдонорун жар салды. Анткени бул өндүрүшкө керек. Демек, мунай өндүргөн араб өлкөлөрүнөн аны арзан сатып алууну каалайт, алар дайыма кымбат сатсам дейт. Айтор, АКШ президентинин экономикалык саясаты бир кылка эмес", — деди Мамытов.
Ал ошондой эле АКШнын алдыдагы экономикалык саясатын талкуулоого Трамп Улуттук банктан өкүл чакырбай койгону, ал өлкөдөгү кризиске толугу менен мурдагы бийликтин көз карашын колдогондорду жектеп, аларсыз эле жаңы кадамдарды баштаганын билдирип турарын кошумчалады.
