Садыр Жапаров Кемин шаарын куруу боюнча жарлыкка кол койду
19:51 29.01.2025 (Жаңыртылды: 10:16 31.01.2025)
Жазылуу
БИШКЕК, 29-янв. — Sputnik. Садыр Жапаров “Чүй облусунун Кемин районундагы экологиялык жактан таза Кемин шаарын куруу долбоорун ишке ашыруу жөнүндө” жарлыкка кол койду. Бул тууралуу президенттин маалымат кызматы билдирди.
Документте турак жай менен камсыздоо калктын жашоо-турмушунун деңгээлине оң таасирин тийгизери белгиленген. Ошондой эле тышкы жана ички миграцияны азайтууга өбөлгө түзүп, жер-жерлерде квалификациялуу кадрлардын агымын токтотуу менен региондордогу социалдык чыңалуунун деңгээлин төмөндөтө турганы айтылды.
Документти ишке ашыруу максатында төмөнкүлөр токтом кылынат:
Чүй облусундагы 353,3 гектар жерге Кемин шаарын куруу долбоорун ишке ашырууга киришсин;
Кемин районунун мамлекеттик администрациясы курулушту ишке ашырууда бирдиктүү заказчы болуп аныкталсын;
министрликтер жана административдик ведомстволор, президенттин Чүй облусундагы ыйгарым укуктуу өкүлү жана Кемин районунун жергиликтүү өз алдынча башкаруу органдары долбоорду ишке ашырууда тийиштүү колдоо көрсөтсүн;
Архитектура, курулуш жана турак жай-коммуналдык чарба мамлекеттик агенттиги инженердик-геологиялык, топографиялык изилдөөлөрдү аткаруу боюнча долбоор алдындагы иштерди жүргүзсүн. Ошондой эле Кемин шаарынын башкы планын иштеп чыксын;
Энергетика министрлиги Финансы министрлиги, “Кыргызстан улуттук электр тармагы” ачык акционердик коому менен биргеликте шаарды энергия менен камсыз кылуу үчүн каражат тапсын жана тышкы электр тармактарынын курулушун камсыз кылсын;
Министрлер кабинети 2025-жылдын 1-июнуна чейин Кемин шаарын куруу концепциясын иштеп чыксын жана бекитсин. Ошондой эле шаарды куруу боюнча инвесторлор менен сүйлөшүүлөрдү жүргүзсүн жана тиешелүү инвестициялык макулдашууга кол койсун.
