Кадыров: Сириядан мекендештерди кайтаруу татаал процесс болду
11:58 17.01.2025 (Жаңыртылды: 12:16 17.01.2025)
© Sputnik / Арууке Амирдинова
Жазылуу
Тышкы иштер министрлигинин консулдук департаментинин директорунун орун басары Бакыт Кадыров мекендештерди Сирия менен Ирактан кайтарып келүү миссиясы тууралуу айтты.
Сириянын аймагындагы жарандар жалпысынан 6 этап менен алып келинген. Жалпы 454 жаран келсе, анын 317син балдар, 117син аялдар түзөт. Бул тууралуу Бакыт Кадыров Sputnik Кыргызстан радиосунун эфиринде маек куруп жатып билдирди.
Кадыров: Сириядан мекендештерди кайтаруу татаал процесс болду
Анын айтымында, Сирия, Иракка барган жарандардын дээрлик өздүк тастыктоочу документи жок болгондуктан көп изилдөөлөр жүргүзүлгөн.
"Башында Сириянын жана Ирактын аймагындагы согуштук, террордук уюмдарга кыргызстандыктардын кошулуп жүргөнү тууралуу маалыматтар келди. Анын чын-бышыгын өлкөдөгү тийиштүү мекемелер, органдар талдап, эмне себептен, кантип, кайсы өлкөлөр аркылуу кетип жатканын өзүнчө анализ кылышкан. Анализдин жыйынтыгы менен биздин жарандар Сириянын түндүк-чыгышында, Ирактын аймагында жүргөнү аныкталган. ТИМдин чет мамлекеттеги консулдук мекемелери дагы алардын өздүгүн тактап, талдоо иштерин жүргүздү. Ошол убакта "Ислам мамлекети"* деп аталган уюмдун жогорудагы аймактарда террордук аракеттерди көрүп жатканы баарына белгилүү болгон. Бул топтун арасында биздин жарандардын да бар экени тууралуу маалыматтар 2014-2015-жылдары түшкөн. Кийин баарына эле белгилүү болгондой, бардык мамлекеттер өз жарандарын Сирия, Ирак аймагынан кайтаруу иштерин башташкан. Кыргызстанда президенттин тапшырмасынын алкагында жана ошондой министрлер кабинети бекиткен иш-пландардын негизинде 2022-2023-жылдары кайтаруу миссиялары жанданды. Негизи бул жумуштар 2018-жылы башталган. Анткени иш бир гана Сириянын мамлекеттик органдары менен сүйлөшүүлөрдүн натыйжасында бүтүп калган эмес. Ал өлкөнүн аймагында башка да топтор бар, биздин жарандар алардын лагерлеринде да жайгашкан. Ушундай татаал процесс менен коштолду. Андан кийин 2020-жылы коронавирустан улам пандемия башталып калды. 2022-жылы биздин делегация Дамаск шаарына барып, Сирия тарап менен тиешелүү жолугушууларды жүргүзүп, натыйжада кыргызстандыктарды мекенине кайтаруу макулдашуусу ишке ашкан", — деди Кадыров.
Ал мекенине кыргызстандыктарды кайтарууда башка мамлекеттердин да тажрыйбалары эске алынганын кошумчалады.
