Жапаров: балдардын күлкүсү жаңырып турсун деп абактын ордуна үй курдук
14:43 24.12.2024 (Жаңыртылды: 14:53 24.12.2024)
Жазылуу
БИШКЕК, 24-дек. — Sputnik. Абак деген абак, өзүнүн сүрү бар, кандай болгон күндө дагы борбор калаабызга шаң тартуулай албайт. Ошондуктан №47 колонияны шаар четине чыгарып, ордуна жай турмуш өкүм сүрсүн деген ниетте турак жай курууну пландаганбыз. Бул тууралуу өлкө башчы Садыр Жапаров билдирди.
Ал бүгүн мамлекеттик ипотеканын алкагында дагы 510 бишкектик үй-бүлөгө батирлерди тапшырды.
"Бул турак жай комплекси үчүн алынган жер тилкесинде мурда №47 түзөтүүчү колония жайгашканын жакшы билесиздер. Абактын ордуна үй курулуп жатат деп ар нерсени жоромолдогондор болду. Урматтуу үй ээлери, абакты бул жакка коёлу, азыркы жашап жаткан үйлөрүңөрдүн таман астында адам атадан бери санасак миңдеген адамдардын сөөгү жатат. Эгер чындап келсе дүйнө жүзүндө, тоолорду кошпогондо, түз жерлерде, таза жер жок. Зулкарнайн деген пайгамбарыбыздын көзү өткөндө таза жер издеп, ошол мезгилде эле табышкан эмес. Ошондуктан биз бул кичи районду жакшылыкка жоруп, келечек муундарга түрмөлөрдү эмес, жаркыраган турак жайларды куруп берип кетели деп атын "Мурас" койдук. Кудай буюрса, "Мурастын" үйлөрүнөн балдардын күлкүсү жаңырып, шаарыбызды көрккө бөлөйт деген үмүттөмүн", — деди Жапаров.
Ал бүгүнкү берилип жаткан үйлөр жалпы 4 700 батирди камтыган ири долбоордун бир гана бөлүгү экенин кошумчалады.
