Эмдиги жылы Ысык-Көлдөгү пансионаттардын баасын көзөмөлдөө боюнча иш жүрөт
© Sputnik / Асель Сыдыкова
Жазылуу
Ысык-Көл районунун акими Жапарбек Ормонов жайкы туристтик сезондун жыйынтыкталышы тууралуу айтып берди.
Быйыл Ысык-Көл районунда саркынды суулардын курулмасы жок жана талапка толук жооп бербеген он пансионат жабылды. Бул тууралуу Жапарбек Ормонов Sputnik Кыргызстан радиосуна маек куруп жатып билдирди.
Эмдиги жылы Ысык-Көлдөгү пансионаттардын баасын көзөмөлдөө боюнча иш жүрөт
Эмдиги жылы Ысык-Көлдөгү пансионаттардын баасын көзөмөлдөө боюнча иш жүрөт
Анын айтымында, Транспорт министрлиги суу транспортторунун техникалык абалын бирден текшерип, анан иштөөгө уруксат берген.
"Негизинен быйыл жайкы туристтик сезон кеч келгени менен жакшы болду. Сентябрь айы келип калса да эс алуучулардын аягы сууй элек. Элдин жашоо шарты жакшыргандыктанбы, айтор, ички туризм өнүгүп-өсүүдө. Муну менен катар коңшу мамлекеттер менен болгон мамиленин жакшырышы да эс алуучулардын санын көбөйттү. Тейлөө жаатында да кадрдык маселелерди чечүүгө абдан аракет кылдык. Көлүбүздүн экологиясын сактоо жаатында да бир катар иштер жасалды. Президенттин "Ысык-Көлдүн экологиясын сактоодогу кечиктирилгис чаралар жөнүндөгү" 131-жарлыгынын негизинде атайын иш жүргүздүк. Талапка жооп бербеген 10го жакын пансионатты жана авариялык абалдагы бир катар пирстердин иштөөсүн токтоттук. Муну менен катар суу транспортторун жөнгө салуу иштери жүрдү. Башкача айтканда, көл жээгинен техникалык зоналарды өзүнчө бөлүк. Мурда скутер, банан айдагандар жөнөкөй жарандар менен аралашып сууда сүзүп эле жүрүшчү. Буга чейин эл арасында кемелер саркынды сууларын көлгө төгүп коёру айтылчу. Мындай шалаакылыкка жол бербөө максатында кемелердин дааратканаларын жаап, пломбалап койдук. Ал эми парашюттардын ишин көзөмөлдөөнү Экотехинспекцияга бекитип бердик", — деди Ормонов.
Ал кийинки жылы пансионаттардагы жана жалпы көл жээгиндеги бааны көзөмөлдөө боюнча иш жүрөрүн кошумчалады.
