Камчыбек Ташиев камакка алынган бажасы боюнча үн катты
17:42 19.07.2024 (Жаңыртылды: 17:53 19.07.2024)
© Фото / пресс-служба кабинета министров КРУКМК төрагасы Камчыбек Ташиев. Архивдик сүрөт
![УКМК төрагасы Камчыбек Ташиев. Архивдик сүрөт УКМК төрагасы Камчыбек Ташиев. Архивдик сүрөт - Sputnik Кыргызстан, 1920, 19.07.2024](https://sputnik.kg/img/07e7/01/16/1072229993_0:116:3076:1846_1920x0_80_0_0_859471d8df2bd86a1be4dc0297dc890b.jpg)
© Фото / пресс-служба кабинета министров КР
Жазылуу
УКМК төрагасы Ошто мамлекеттик органдар жана жергиликтүү бийлик өкүлдөрү менен жыйын өткөргөн.
БИШКЕК, 19-июл. — Sputnik. Мыйзам бузса ким экенине карабай камалат, президенттин тууганы, менин бажам камакта отурат. Бул тууралуу УКМК төрагасы Камчыбек Ташиев билдирди.
Маалыматка ылайык, ал Ошто мамлекеттик органдардын жана жергиликтүү бийликтин өкүлдөрү менен болгон жыйында коррупцияга аралашпоону эскертип, мыйзам бузгандар жоопко тартыларын айткан.
"Мамлекет кезекте тургандар үчүн 138 гектар жерди трансформациялады. Аны жергиликтүү органдар сатып жатат. Акимге, депутатка, өкмөткө беришибиз керек деп элден акча чогултушууда. Бир чекти (үлүш жер — ред.) 50 миңден 300 миң сомго чейин сатышууда. Мамлекет анын баарын акысыз трансформация кылып берсе, силер сатып жатасыңар. Элден чогулган 300-350 миң доллар Жогорку Кеңешке чейин жеткени боюнча маалыматтар бар. Бул боюнча арыз түшсө баары камалсын. Президенттин эки бир тууганы мыйзамды бузганы үчүн азыр камакта отурат. Президент ал экөөнү тең аяган жок. "Мыйзамды буздубу, жоопко тартылсын" деди. Анын фамилясы да Жапаров Улан (экинчиси ким экенин так айткан эмес). Мына менин бир тууган кайнежемдин күйөөсү, бажам мыйзамды бузганы үчүн камакта. Эч кайда кете албайт. Ким болбосун мыйзам алдында жооп берет. Уктуңарбы? Мен мэрмин, губернатормун, министрмин, мага тийбейт деген болбойт. Жергиликтүү бийлик органдарын жоопко тартыш оңой эле. Бир саатта эле алып барып камап коюшат", — деди Ташиев.
Ошондой эле ал өзгөчө мектептерден акча чогулткандар менен катуу күрөшүүгө чакырды.
Эске салсак, Камчыбек Ташиевдин бажасы кармалганын укук коргоо органдары 17-июлда билдирген. Ошол эле күнү президент Садыр Жапаровдун жакын тууганы Улан Жапаров кармалганы кабарланган. Экөө тең алдамчлыкка шектелип камакка алынган.