ИИМ түндө башаламандыкка алып келген мушташ эмнеден чыкканын айтты
18:19 18.05.2024 (Жаңыртылды: 18:20 18.05.2024)
© Фото / пресс-служба ГУОБДД МВД КР
Жазылуу
Министрлик массалык башаламандыкты жараткан мушташка катышкан жергиликтүү төрт жигиттин экөөнүн аты-жөнү аныкталганын билдирди.
БИШКЕК, 18-май — Sputnik. 17-майда түндө Бишкектеги башаламандыкка алып келген мушташ шаардагы тамактануучу жайлардын биринин алдында башталган. Ички иштер министрлиги окуянын чоо-жайын айтты.
Жаштардын толкундоосун жараткан мушташ төмөнкүдөй болуп күчөгөн:
13-майда түнү Бишкекте азиат түспөлүндөгү белгисиз адамдардын тобу Чыгыш-5 кичи районундагы пиццериянын жанында чет элдик студенттерге жолугуп, "эмне үчүн бул жерде тамеки чегип жатасыңар" деп коркутушкан. Алардын бири кол көтөрүп баштаганда чет өлкөлүктөр качып, Огонбаев көчөсүндөгү жатаканага барышкан.
Белгисиз адамдардын тобу чет элдик жарандарды кууп барып, жатаканага кирип, күч колдонуп акча жана буюмдарын тартып алышкан.
Алар ар кайсы бөлмөлөрдүн эшигин тээп, кыздар жашаган бөлмөлөргө киргенде чет элдик жарандар чогулуп келгендерди кетирүүгө аракет кылып, ортодо мушташ чыккан.
Кууп келгендер бир шеригин таштап качып кетишкен. Чет элдиктер Тез жардам чакырып, таяк жеген адамды ооруканага жөнөтүшкөн. Ооруканага келгенде ал атын өзгөртүп айтып, окуянын жагдайы боюнча түшүндүрмө берген эмес. Арыз менен да кайрылган эмес. Керектүү медициналык жардамды алып, кетип калган.
Тергөөнүн жүрүшүндө жатаканада чет элдик жарандарга кол салган төрт адамдын экөө аныкталды, алар 18-19 жаштагы жигиттер.
17-майда соцтармактагы баракчалардын биринде массалык мушташтын видеосу тараган. Анда окуянын жагдайы айтылбагандыктан коомчулуктун нааразычылыгын жаратып, толкундоолорго алып келди.
ИИМ бул арада "окуядан каза болгондор бар" деген маалыматтар тараганын жана ал чындыкка дал келбей турганын белгиледи.
Эске салсак, 17-май күнү кечинде Бишкекте чет элдиктер жашаган мейманкананын жанына 200дөй адам чогулган. 13-майда бул жерде чет элдиктердин катышуусунда мушташ болгондугу маалымдалган. Топтолгон адамдарды милиция кызматкерлери курчап, өзүн агрессивдүү алып жүргөн 50дөй кишини кармап, кийин кайра коё берген. Түн оогондо чогулгандардын саны көбөйүп, миңге чейин жеткени айтылган.
Алар менен Бишкек ШИИББдин жетекчиси сүйлөшүү жүргүзүп, топтолгондор таңга жуук тарашкан.
Бул арада мушташка катышкан делип чет элдик үч жаран кармалып, убактылуу кармоочу жайга киргизилгени белгилүү болгон. Алар кыргыз элинен кечирим сурап, жоопкерчилик тартууга даяр экенин билдиришкен.
Учурда ордо калаада абал туруктуу экенин ИИМ белгилеп, кырдаал толук көзөмөлдө экенин айтууда.
Саламаттык сактоо министрлиги башаламандыктан 29 киши жабыркаганын кабарлады.
