Жаңылыктар. Чыгарылыш 11:00

Жаңылыктар. Чыгарылыш 11:00
Жазылуу
Кыргызстан менен Тажикстандын өкмөтүнүн жумушчу топтору чек араны тактоо боюнча кезектеги сүйлөшүүнү өткөрдү. Бул тууралуу өкмөттүн маалымат кызматы кабарлады.Жолугушуу 5-11-май күндөрү Тажикстандын Бустон шаарында өттү. Тараптар тактала элек тилкелерде чек ара сызыктарын чийүү боюнча сунуштарды угушту. Жолугушуу достук жана өз ара түшүнүшүү атмосферасында өткөн. Кийинки жолугушуу Кыргызстанда болуп, сүйлөшүүлөр уланмакчы.
Бут кийим өндүрүүчүлөр жана экспорттоочулар продукцияны Казакстанга ташып келгенге чейин же бажы жол-жоболоруна киргизгенге чейин маркаланышы керек. Бул тууралуу Мамлекеттик салык кызматынан билдиришти.Маалыматка ылайык, Казакстанда бут кийим товарларын маркалоо жана көзөмөлдөө эрежелерине өзгөртүүлөр киргизилген. Ага ылайык, товар калдыктарын маркалоо 1-июнга чейин жүргүзүлөт."Казакстанда бут кийим товарларын маркалоонун жана байкоо жүргүзүүнүн жаңы эрежелерине ылайык, идентификациялоо каражаттары менен маркаланбаган бут кийим товарларын жана алардын калдыктарын жүгүртүүгө жана жүгүртүүдөн чыгарууга жол берилбейт", — деп жазылат маалыматта.Ошондой эле 1-июнга чейин продукцияны маркалоо аларды импорттоочунун кампаларында ички керектөө же реимпорт үчүн чыгаруу бажы жол-жобосуна жайгаштыргандан кийин жүргүзүлүшү мүмкүн экени кошумчаланды.
Боом капчыгайында беш күн убак-убагы менен таш кулатылат. Бул тууралуу "Кыргыз темир жолу" ишканасынан билдиришти.Маалыматка ылайык, иш-чара 13-майдан баштап 17-майга чейин созулат."Таш кулатуу иштери саат 9:00дөн 15:00гө чейин ЖКККББнын кызматкерлери жолду жарым-жартылай тоскондон кийин жүргүзүлөт. Унаалар бир тилке менен жүрөт", — деп айтылат маалыматта. Иш-чара автоунаа жана темир жол транспортунун коопсуздугун камсыздоо максатында өткөрүлүүдө.
Башкы прокуратура "Кыргыз Республикасынын прокуратура органдарына 100 жыл: тарыхы жана азыркы учур" аттуу темада сынак жарыялаганын билдирди. Конкурска 14 жаштан 35 жашка чейинкилер катыша алат. Алар мыкты сүрөт, видеоролик же дил баян даярдаса болот. Сынактык иштерди 1-октябрга чейин аймактык прокуратура органдарына тапшыруу зарыл.
Балбан Айаал Лазарев Париж Олимпиадасына жолдомо утту.Күрөш боюнча дүйнөлүк лицензиялык турнир Стамбулда өткөн. Анда кыргызстандык балбан 125 килограммга чейинки салмакта Ямайка жана Өзбекстандын спортчуларын жеңип, кийин венгриялык атаандашын 12:2 эсебинде уткан. Ушуну менен Олимпиада оюндарына катыша турган кыргызстандык спортчулардын саны 11 болду.
Евробиримдик Украинага коопсуздук кепилдигин берүү боюнча келишимдин долбоорун макулдашты. Бул тууралуу Германиянын Welt басылмасы жазды. "Долбоорго ылайык, Евробиримдиктин аскерлери Украинада Россияга каршы согуштук аракеттерге түз катышпайт. Украинага чабуул жасалса ЕБ Киевге муктаждыктары боюнча сутка ичинде кеңешин сунуштайт", — деп айтылат материалда. Талкууланып жаткан коопсуздук кепилдиктери Украинага саясий, аскердик жана экономикалык жардам көрсөтүүнү камтыйт. Ал өлкө Евробиримдикке жана НАТОго киргенге чейин жарактуу. Басылма Брюссель бул кепилдиктерди эң ​​кеч дегенде июлдун башында берүүгө ниеттенип жатканын белгилеген. Документтин версиясынын долбоору Киев менен талкууланууда.
Жаңылыктар түрмөгү
0