Күнүмдүк жаңылыктар 13:00

Күнүмдүк жаңылыктар 13:00
Жазылуу
Президент Садыр Жапаров кыргызстандыктарды Орозо айт майрамы менен куттуктады. Ал ыймандын бир шагы катары эсептелген орозодо жан дүйнөбүздү тазалап, жаратканга болгон ишенимибизди дагы кыйла бекемдеп, напсибизди тыюу менен бирге ден соолугубузга да кам көрдүк деп белгилеген. "Муну менен кошо орозодо мээримдүүлүк, боорукерлик сезимдер артып, кайрымдуу иштер арбыйт. Мындан улам бул улуу айда жалпы элибиздин ынтымагы дагы бир ирет чыңдалганына толук ишенем. Мамлекетибиздин алган багыты дагы эл-журттун жан дүйнөсүн тазартып, жаратмандыкка үндөө, азыркы ааламдашуу агымынан артта калбай, ошол эле маалда дүйнө жүзүндө болуп жаткан окуяларга олуттуу, салмактуу, сабырдуу мамиле кылуу болуп саналат", — деп айтылат куттуктоо сөзүндө. Президент ар бир кыргызстандыктын орозодо тилеген тилектери кабыл болушун каалап, элге, мамлекетке ак кызмат кылууга чакырган.
2011-жылдан бери дыйкандарга 15 миллиард сомго техника лизингге берилди. Бул тууралуу Суу ресурстары, айыл чарба жана кайра иштетүү өнөр жай министрлигинен билдиришти. Маалыматка ылайык, фермерлерди айыл чарба техникалары менен камсыздоо максатында жылдык үстөгү 6-9 пайыз менен 7 жылдан 10 жылга чейин лизинг берилүүдө. "2011-жылдан тартып бүгүнкү күнгө чейин бардыгы болуп 15 миллиард сомго 6 196 даана техника лизинг жолу аркылуу дыйкандарга берилди. Ал эми 2024-жылдын апрель айынын башына карата 1,4 миллиард сомго 282 техника берилди", — деп айтылат маалыматта. Ошондой эле аталган долбоорго "Айыл банк" оператор экени айтылып, министрликтин көзөмөлүндө ишке ашып жатканы кошумчаланды.
Бишкектин батыш тарабында Ми-8МТВ үлгүсүндөгү тик учактын кулашы боюнча алдын ала иликтөө иштери аяктады. Бул тууралуу Кыргызстандын Куралдуу күчтөрүнүн Генералдык штабынын башчысы Руслан Мукамбетов Sputnik радиосуна курган маегинде айтты. Буга чейин министрликте окуянын себебин иликтей турган атайын комиссия түзүлгөн. "Комиссия кырсыкты иликтеп бүттү, бирок Аскер прокуратурасы дагы деле тергөө иштерин жүргүзүүдө. Алдын ала маалыматтар боюнча, тик учактын бардык агрегаттары жана тетиктери оң эле болгон. Ми-8 МТВ тик учагынын кулашына аба ырайынын катаал шарты жана адамдык фактор себеп экени аныкталууда", — деген Мукамбетов. Ошондой эле ал бул окуядан кийин Абадан коргонуу күчтөрүнүн башчысы Кылычбек Айдаралиев кызматтан четтетилгенин эске салды. Айтымында, эми ал кызматтан биротоло алынган. Абадан коргонуу күчтөрүнүн башчысы кызматынын милдетин убактылуу аткаруу Талант Талиповго жүктөлгөн.
Бишкекте студенттер арасында "Жаңы ысымдар" эл аралык театр фестивалы өтөт. Бул тууралуу Маданият, маалымат, спорт жана жаштар саясаты министрлиги кабарлады. Билдирмеге караганда, иш-чара 16-19-апрель күндөрү уюштурулат. Бул эл аралык фестивалга Кыргызстан, Казакстан, Өзбекстан, Россия жана Азербайжан өлкөлөрүндө театр жаатында билим алып жаткан студенттер катышат. Иш-чарада "Мыкты спектакль", "Аялдын мыкты ролу", "Эркектин мыкты ролу", "Мыкты драматургия" сыяктуу номинациялар боюнча 1-2-3-орун алган жеңүүчүлөр акчалай жана атайын дипломдор менен сыйланары кошумчаланды.
Жаңылыктар түрмөгү
0