Экономист: кыргыз ишканалары ЕАЭБдеги тендерлерге катыша алат
© Sputnik / Асылбек Бактыбеков
Жазылуу
Экономист Улукман Мамытов ЕАЭБдеги тендерлерге банктык кепилдиктерди өз ара таануу макулдашуу тууралуу түшүндүрмө берди.
Кыргыз ишкерлери ЕАЭБдеги тендерлерге катышуу мүмкүнчүлүгүнө ээ болушту, бирок уюмдагы мамлекеттердин ишкерлерине тең ата болчу ишканалар саналуу. Бул тууралуу Улукман Мамытов Sputnik Кыргызстан радиосунда маек куруп жатып билдирди.
Экономист: кыргыз ишканалары ЕАЭБдеги тендерлерге катыша алат
Анын айтымында, өлкөдө эл аралык деңгээлдеги ишканаларды өстүрүп чыгуу боюнча стратегия түзүлүшү керек.
"Кыргызстандык ишкерлер ЕАЭБдин ичиндеги ири тендерлерге катышуу үчүн кыргыз банктары кепилдик берет. Ишкерлер Россиядагы же Казакстандагы тендерлерге катышып өз продукциясын же кызматын сатып, бул экспорт катары эсептелинет. Баарыбызга белгилүү болгондой, мамлекеттик тендерлер ири көлөмдөгү тапшырыктарды берип, кирешелүү тармак болуп саналат. Бирок ошол эле Россия, Казакстанда жана уюмдагы башка ири ишканалар менен атаандашыш керек. Буга кыргыз ишканалары даярбы деген суроо жаралат. Анткени бизде эл аралык деңгээлде иштеген корпорация, ишканалар саналуу. Ошондуктан мамлекет тарабынан ири ишканалардын пайда болушуна, алардын өнүгүшүнө багытталган стратегия түзүү зарыл. Бизде чакан, кичи ишкерлик колдоого алынып келет. Ошол эле учурда эл аралык деңгээлде иш алып барып, өлкөгө чоң каражат алып келип, ошого жараша көп салык төлөй турган ишканалар жок болууда. Маселен, республикалык деңгээлде курулуш, жол салуу ж.б. багыттагы ишканалар бар. Бирок алар эл аралык рынокко чыкпай жатат, ошондуктан аларды өстүрүү зарыл", — деди Мамытов.
Ошондой эле ал ЕАЭБдеги ишканалар дагы Кыргызстандагы тендерлерге тоскоолдуксуз катыша аларын кошумчалады.
