Чылым чеккендер чекпегендерге караганда сасык тумоого 4 эсе көп кабылат
09:04 24.02.2024 (Жаңыртылды: 15:19 25.02.2024)
© Sputnik / Александр Кряжев
/ Жазылуу
Тамеки чекпесе дагы чеккендер менен чогуу болуп, түтүнү менен дем алгандар үчүн да зыян. Айрыкча чылым чегилген үйдө балдардын болушу кооптуу.
БИШКЕК, 24-фев. — Sputnik. Ооруларды алдын алуу жана мамлекеттик санитардык-эпидемиологиялык көзөмөл департаменти чылым кандай ооруларды шарттай турганын айтып, аларды тизмектеди.
Чылымдын кесепети:
тамеки өпкөнү ыштайт, адам өпкө рагына кабылышы мүмкүн;
тиштер түшүп, кош бойлуу аялдардын балдары ден соолугу начар болуп төрөлөт, боюнан түшө берет;
жүрөк-кан тамыр системасынын, дем алуу жана тамак сиңирүү органдарынын ооруларын, коркунучтуу шишиктин пайда болуу мүмкүнчүлүгүн жогорулатат;
ичеги-карынында жарасы бар бейтаптардын абалын начарлатат;
чылым чеккендер инфекциялык ооруларга тез кабылат. Мисалы, алар тамеки тартпагандарга караганда сасык тумоо менен төрт эсе көп ооруйт;
тамеки чеккендер менен чогуу болуп, түтүнү менен дем алгандар үчүн да зыян. Айрыкча тамеки чегилген үйдө балдардын болушу кооптуу (тамекинин түтүнү артерия канын кычкылтек менен камсыз кылуучу гемоглобинге терс таасир этет). Ошондуктан бөлмөдө тамеки чекпей, үйдү тез-тез желдетип туруу зарыл;
чылымчылар кандайдыр бир адаттан тыш кырдаалга кабылганда тамекини үстөккө-босток тарта берет, натыйжада никотинге катуу ууланып калат (башы ооруп, оозу кургайт, уйкусу бузулат).
Департамент тамеки тартпагандарга караганда чылым чеккендер арасында өпкө эмфиземасынан өлүм учуру 25 эсе, өнөкөт бронхиттен 21 эсе, жүрөктүн ишемиялык оорусунан 3-5 эсе көп болорун эскертип, бул адаттан арылууга, чылым чекпөөгө чакырды.
