Келдибеков: мекемелердин бухгалтерлери эми онлайн көзөмөлдөнөт
© Sputnik / Шабдан Абылгазы уулу
Жазылуу
Финансы министрлигинин борбордук казыналыгынын директорунун орун басары Талант Келдибеков "Бирдиктүү бухгалтердик эсеп" долбоору тууралуу маалымат берди.
Өлкөдөгү мекемелердеги бухгалтерлерди онлайн-көзөмөлдөөгө мүмкүн болгон "Бирдиктүү бухгалтердик эсеп" программасы киргизилүүдө. Бул тууралуу Талант Келдибеков Sputnik Кыргызстан радиосунда маек куруп жатып билдирди.
Келдибеков: мекемелердин бухгалтерлери эми онлайн көзөмөлдөнөт
Анын айтымында, бул платформа менен параллелдүү мурдагы "1С" программасы дагы иштеп жатат.
"Борборлоштурулган бухгалтердик эсеп долбоору иштелип чыгып, жыл башынан бери республика аймагына киргизилүүдө. Негизги максаты финансылык башкарууда системаны өркүндөтүү жана ачык айкындуулукту камсыздоо болуп саналат. Ошондой эле бул отчеттуулукту ыкчам жүргүзүүгө мүмкүндүк түзөт. Башкача айтканда, республикалык жана жергиликтүү бюджеттен каржыланган мекемелердин кирешеси жана чыгашасы тийиштүү мекемелер жана өлкө жетекчилиги тарабынан көзөмөлдөнөт. Учурда "Бирдиктүү бухгалтердик эсеп" менен мурдагы "1С" программасы дагы параллель иш алып барууда. Анткени жаңы ыкма менен азыркы иштеп жаткан механизмди дагы бузуп албоо маанилүү. Эгерде жаңы киргизилип жаткан программада кемчилик, мүчүлүштүк, тобокелдиктер аныкталса, мурдагы менен салыштырууга шарт түзүлөт. Эгер жыл соңуна чейин бирдиктүү бухгалтердик эсеп жакшы натыйжа берсе кийинки жылы мурдагы программадан баш тартып, жаңысы толук кандуу колдонула баштайт. "Бирдиктүү бухгалтердик эсеп" платформасында баары онлайн-режимде болот. Эгерде финансылык чечимдерде кемчилик аныкталса, туура эмес чыгаша болсо операцияны дароо токтотууга шарт түзүлөт. Бул кемчиликти кеч боло электе оңдоого мүмкүндүк берет", — деди Келдибеков.
Ошондой эле бул программа отчетторду кагаз түрүндө ташуу түйшүгүнөн арылта турганы кошумчаланды.
