Унааны кышка даярдоодо эмнеге көӊүл буруу керек?
© Sputnik / Асель Сыдыкова
Жазылуу
Адис Эрулан Токторбеков ар бир айдоочу кышка даярданууда ага жоопкерчиликтүү мамиле жасашы керектигин айтты.
Алыскы жолго чыккан айдоочулар жанына кошумча дөӊгөлөк, тайгак, тоӊголок жолго каршы чынжырча ала жүрүшү зарыл. Бул тууралуу Эрулан Токторбеков Sputnik Кыргызстан радиосунун эфиринде маек куруп жатып билдирди.
Унааны кышка даярдоодо эмнеге көӊүл буруу керек?
Анын айтымында, кышкысын көптөгөн кырсыктар дөңгөлөктү алмаштырбагандан жана тормоздук системаны карабагандан улам келип чыгат.
"Эӊ алгач дөңгөлөктөрдү кышкысына алмаштыруу керек. Эски дөңгөлөктөрдү эмес, жаңысын алууга аракет кылыӊыз. Себеби ар бир дөңгөлөктүн колдонуу мөөнөтү бар. Эгер мөөнөтү өтүп кеткен болсо, анын коопсуздугуна кепилдик жок болот. Өзгөчө алыскы каттамдарга чыккан жана коомдук транспорт айдаган айдоочулар эртерээк кыштын камын көрүшү керек. Автоунаа жолдо кетип бара жатып жөн эле бузулуп калбайт. Ага чейин эле бузулуп жаткан болсо ар түрдүү белгилерди берет. Учурунда мастерлерге барып жасатып алуу каражатты алда канча үнөмдөйт. Ал эми унаанын майын сегиз миң чакырым басып өткөндөн соӊ алмаштыруу зарыл. Унааны профилактика иретинде жөнөкөй айдоочулар 6 айда бир, ал эми такси кызматындагы айдоочулар бат-баттан текшертип турушу абзел. Унаадагы резина түтүктөрдү, тормоздук шлангдарды, үндү блоктоочу каражаттарын текшерүү зарыл. Ошондой эле антифриз жана айнек жуучу суюктукту текшерүүнү унутпаңыз. Ал тоӊдурбоочу самын суюктукту камтышы керек. Эгерде суу калган болсо, аны төгүп салыӊыз. Анткени суукта тоңуп, бак жарылып кетиши мүмкүн", — деди Токторбеков.
Ал суукта унааны айдап келген соӊ айнектерин ачып ичин муздатып туруп токтотуп койсо, эртеӊ мененкисин эгер кар жааса унаага жабышып, тоӊбой турганын кошумчалады.
