Өмүрбекова: ЕАЭБдин төрт максатынын бири — бирдиктүү эмгек рыногун түзүү
© Sputnik / Асель Сыдыкова
Жазылуу
ЕЭКтин Эмгек миграциясы жана социалдык коргоо департаментинин директору Алтынай Өмүрбекова эмгек мигранттары үчүн түзүлгөн жеӊилдиктер тууралуу айтып берди.
Бирдиктүү эмгек рыногун түзүү — ЕАЭБдин төрт негизги интеграцияларынын бири. Келишимге ылайык, Кыргызстандын жарандары Россия Федерациясында 30 күндүн ичинде каттоодон өтө алат. Ал эми башка үчүнчү мамлекеттен келген мигранттар жети күндүн ичинде каттоодон өтүшү зарыл. Бул тууралуу Алтынай Өмүрбекова Sputnik Кыргызстан радиосунун эфиринде маек куруп жатып билдирди.
Өмүрбекова: ЕАЭБдин төрт максатынын бири — бирдиктүү эмгек рыногун түзүү
Анын айтымында, эмгек мигранттары кайсы чет мамлекетке барбасын, ошол өлкөнүн мыйзамдарын так билип алышы зарыл.
"Эмгек мигранттары жумушка орношкон соң медициналык милдеттүү камсыздандыруу полисин толтурууга жана анын негизинде медициналык кызматтарды акысыз алууга укуктуу. Азыр эми иштебеген үй-бүлө мүчөлөрүнө да полис берүү мүмкүнчүлүгү каралып жатат. Кыргызстандыктар үчүн киреше салыгы Россиянын жарандары менен эле бирдей, 13 пайыз. КР жарандарынын Россиядагы эмгек тажрыйбасы пенсияны каттоодо жана аны чегерүүдө эсепке алынат. Ошентсе да мекендештер арасында көйгөйлөр да бар. Эмгек мигранттары кайсы чет мамлекеттке барбасын, ошол өлкөнүн мыйзамдарын так билип алышы керектигин эскертем. Россиядагы чет элдик жарандар боюнча федералдык мыйзамга киргизилген өзгөртүүлөр болууда. Анын талаптарына ылайык, чет элдиктер дактилоскопиядан бир жолу өтүп коюшу зарыл. Ал эми эмгек мигранты милдеттүү медициналык камсыздандыруудан (ММК) жыл сайын өтүп туруусу абзел. Бизде бул жаатта маселе жаралып келет. Россиянын тиешелүү органдары менен сүйлөшүп жеӊилдиктерди алдык. Мурун 6 жаштан баштап медкароодон өтүү керек болсо, азыр токсикологиялык изилдөөдөн 13 жаштан баштап, ал эми 18 жаштан тарта флюорографияга түшөт. Андан тышкары, бул маалым каттар мурда үч айга гана берилсе, эми жарактуулугу бир жылга узартылды. ЕЭКтин алдындагы маанилүү тапшырмалардын бири — каттоо маселеси. РФ мыйзамдары боюнча адам жашаган жери боюнча каттоого турушу керек. Бирок батирин ижарага бергендердин көпчүлүгү салыктан качкандан улам мамлекетке үйүндө канча адам жашап жатканын ачык көрсөтүп бергиси келбейт. Буга байланыштуу мигранттар бир жерде жашап, бирок таптакыр башка жакта каттоого турууга аргасыз болгон. Азыр эми миграция мыйзамдарына киргизилген өзгөртүүлөргө ылайык, мекендештер "Госуслуги" порталынан онлайн-каттоого тура алышат", — деди Өмүрбекова.
Ал Россияга барган мигранттар "өзүн-өзү иш менен камсыздоочу" статусун толтурган учурда дароо РФтеги жүргөн аймагына автоматтык түрдө каттоого турууга мүмкүнчүлүк берген долбоор иштеп жатканын кошумчалады.
