Осмоналиев: айрым жетекчилер тил мыйзамын ишке ашырууда аша чаап жатышат
Жазылуу
Президентке караштуу Мамлекеттик тил жана тил саясаты улуттук комиссиясынын төрагасы, профессор Каныбек Осмоналиев мамлекеттик тил боюнча кабыл алынган жаңы мыйзамды ишке ашырууда айрым жетекчилер аша чаап жаткандыгын айтты.
Учурда "Кыргыз тест" ишканасынын алдында кезек күткөндөр базардагыдай болуп көбөйүп кетти. Анткени кээ бир министр, мэр жана башка жетекчилер белгилүү бир күндү айтып, ошол убакытка чейин кызматкерлерин мамлекеттик тилди билүүсү боюнча тесттен өтүп, сертификатын алып келүүсүн талап кылып жатыптыр. Болбосо иштен кетесиң дегенге чейин жеткен учурлар бар экени өкүндүрөт. Бул тууралуу Каныбек Осмоналиев Sputnik Кыргызстан радиосуна маек куруп жатып билдирди.
Осмоналиев: айрым жетекчилер тил мыйзамын ишке ашырууда аша чаап жатышат
Осмоналиев: айрым жетекчилер тил мыйзамын ишке ашырууда аша чаап жатышат
Анын айтымында, учурда Мамлекеттик тил жана тил саясаты комиссиясы тарабынан терминдерди унификациялоо жүрүүдө.
"Мамлекеттик кызматтарда бир эле мамлекеттик тилди билген эмес, расмий тилди да өздөштүргөн кадрлар иштеши керек. Биз азыр жетекчилерге ушундай талап коюп жатабыз. Мамлекеттик кызматкер мамлекеттик жана расмий тилдерде эркин сүйлөп, жаза билиши керек. Бул — мыйзамдын талабы. Мамлекеттик кызматкер кагаздарын көтөрүп алып коридордо расмий тилден мамлекеттик тилге же тескерисинче которуп берип койчу, деп чуркап жүрбөшү керек. Бирок айрым жетекчилер бөрк ал десе баш алып, аша чаап кетип жатышат. Бир убакытты белгилеп, "ошого чейин "Кыргыз тесттен" барып өтүп кел, мамлекеттик тилди билет деген сертификат алып кел, болбосо иштен кетесиң" деген коркутуулар болуп жатканынан да кабардарбыз. Ал тургай менин өзүмө чалып тууганымды, жээнимди, инимди, карындашымды тесттен өттү кылып берип коюңузчу деп суранган эл өкүлү, чиновниктер көбөйдү. "Кыргыз тест" ишканасы болгону бир жер төлөдө отурат, ошого карабай алдында кезек күткөндөр көбөйдү. Мындай болбошу керек. Биздин мекемеде болгону 18 киши иштейт. Биз азыр мыйзам алдындагы актыларды жазып жатабыз. Баарына жетишпейбиз. Антип бир мөөнөттү белгилеп алып кызматкерлердин жүрөгүнүн үшүн алганды токтотуш керек. Бишкек мэриясы кат жолдоптур, биздин кызматкерлерди тесттен өткөрүп койгула деп. Эмнеге мэрия өзү уюштурса болбойт, тиешелүү бардык мүмкүнчүлүктөрү бар да", — деди Осмоналиев.
Ал жеке сектор дагы көрнөк-жарнак, тиешелүү документтерин мамлекеттик тилге которууда тууралыгын текшерип берүү үчүн тил комиссиясына жиберүүсү күч алганын кошумчалады.
