Өлкөдө инвестициялык сынак өткөрүүнүн методологиясын бекитүү сунушталды
© Sputnik / Асель Сыдыкова
Жазылуу
Президентке караштуу Инвестиция боюнча улуттук агенттиктин жетекчисинин орун басары Нурадил Баясов буга чейин инвестициялык конкурстук тандоо механизми толук бекитилбегенин айтты.
Министрлер кабинетинин"Инвестициялык сынак өткөрүүнүн методологиясын бекитүү жөнүндө" токтомунун долбоору иштелип чыкты. Бул тууралуу Нурадил Баясов Sputnik Кыргызстан радиосунун эфиринде маек куруп жатып билдирди.
Өлкөдө инвестициялык сынак өткөрүүнүн методологиясын бекитүү сунушталды
Анын айтымында, инвестициялык долбоорлорду ишке ашыруунун так жана эффективдүү механизмдерин түзүү аркылуу өлкөнүн инвестициялык жагымдуулугун жогорулатуу максаты турат.
"Буга чейин инвестициялык конкурстук тандоо механизми толук бекитилбеген. Айтылганы менен жетиштүү жумуш жасалган эмес. Эми министрлер кабинетинин "Инвестициялык сынак өткөрүүнүн методологиясын бекитүү жөнүндө" токтомунун долбоору иштелип чыкты. Бирдиктүү эрежелер жана жол-жоболордун атайын методологиясы инвестициялык конкурстук тандоону ачык-айкын жүргүзүү үчүн керек. Бул инвестициялык долбоорлорду алдыга жылдырууга жана ишке ашырууга шарт түзөт. Тандоо конкурстук негизде эки этапта өткөрүлөт. Биринчи этапта катышуучулардын документтеринин квалификациялык талаптарга шайкештиги каралат. Экинчи этапта техникалык, социалдык натыйжалуулуктун жана экономикалык көрсөткүчтөр боюнча натыйжалуулукту баалоонун негизинде конкурстук сунуштарды кароо жана инвестициялык конкурстун жеңүүчүсү аныкталат. Методологияны кабыл алуу инвестициялык долбоорлорду ишке ашыруунун так жана эффективдүү механизмдерин түзүү аркылуу өлкөнүн инвестициялык жагымдуулугун жогорулатат. Токтом долбоору министрликтер жана ведомстволор, жергиликтүү өз алдынча башкаруу органдары, ошондой эле президенттин облустардагы өкүлдөрү менен макулдашуудан өттү", — деди Баясов.
Ал сентябрда долбоорду Жогорку Кеңештин бюджет, экономикалык жана фискалдык саясат боюнча комитетинин жыйынында кароо пландалып жатканын кошумчалады.
