Кыргызстанда депозитти кепилдөөнүн суммасын миллион сомго көтөрүү пландалууда
© Sputnik / Асель Сыдыкова
Жазылуу
Депозиттерди коргоо боюнча агенттигинин аткаруучу директору Кадырбек Букуев 25 банк жана финансылык компанияга салынган аманаттар кепилденерин белгиледи.
Депозиттерди кепилдөөнүн суммасын миллион сомго көтөрүү пландалууда. Бул тууралуу Кадырбек Букуев Sputnik Кыргызстан радиосуна маек куруп жатып билдирди.
Кыргызстанда депозитти кепилдөөнүн суммасын миллион сомго көтөрүү пландалууда
Анын айтымында, учурда кепилденген депозиттин суммасы 200 миң сомду түзөт.
"Депозиттерди коргоо боюнча агенттик 15 жыл мурун түзүлүп, кепилденген аманаттарды төлөп берүү милдетин аркалап келет. Учурда агенттиктин реестринде катталган 25 финансылык мекеменин 23ү — банк. Агенттик кепилденген учур келгенде компенсацияны төлөп берет. Ал үчүн Улуттук банк финансылык уюмдун лицензиясын кайтарып алып, сот банкты же финансылык мекемени банкрот деп табат. Ошондон кийин кепилденген аманаттарды төлөө процедурасы ишке кирип, 30 күндүн ичинде аманаттар 200 миң сомго чейин төлөнүп берилет. Бул багыттагы тийиштүү мыйзамга өзгөртүүлөр киргизилип, кепилденүүчү сумманы миллион сомго чейин көтөрүү сунушталууда. Эгерде аманат чет элдик валютада болсо, финансылык мекеме банкрот деп табылган убакта Улуттук банктагы курс менен кайтарылат. Учурда агенттиктин капиталы 4,9 миллиард сомго жетти. Бул аманаттардын көпчүлүгүн кепилдөөгө шарт түзөт. Бирок белгилей кетүүчү жагдай, агенттиктин тарыхында эки жолу, "Ысык-Көл инвестбанк" жана "Аманат банк" банкрот болгондо компенсация кылынган. Демек, кабатырланууга негиз жок. Банк системасын Улуттук банк катуу көзөмөлдөйт, аталган сектор туруктуу" — деди Букуев.
Ошондой эле ал депозиттик базанын көлөмү 356,5 миллиард сомго жетип, 5 миллион 703 миң 320 аманатчынын эсеби бар экенин кошумчалады.
