Кыргызстандык студенттер Россиянын ЯРПИАР фестивалынан байгелүү кайтышты
18:31 04.05.2023 (Жаңыртылды: 18:32 04.05.2023)
© Sputnik / Асел Акмат
Жазылуу
Жусуп Баласагын атындагы КУУнун реклама жана коомчулук менен байланыш кафедрасынын доценти, филология илимдеринин кандидаты, "Нацпродукт" студенттик командасынын жетекчиси Кенжебек Какишев аталган ЖОЖдун студенттери жалпы россиялык фестивалга катышканын айтты.
Енисейде PR жана реклама жумалыгы дегенди түшүндүргөн ЯРПИАР аталышындагы жалпы россиялык фестиваль бар. Ага быйыл бизден алты студент катышып, байгелүү орундарды багындырды. Бул тууралуу Кенжебек Какишев Sputnik Кыргызстан радиосуна маек куруп жатып билдирди.
Кыргызстандык студенттер Россиянын ЯРПИАР фестивалынан байгелүү кайтышты
Анын айтымында, фестиваль 21 жылдан бери өткөрүлүп келет.
"ЯРПИАР жогорку окуу жайлардын реклама жана PR багытында билим алган студенттер үчүн уюштурулган, Россия Федерациясынын Билим берүү министрлиги колдоп, россиялык ири компаниялары каржылык жактан көмөк көрсөтүп өткөрүлгөн абройлуу фестиваль. Ал 21 жылдан бери өткөрүлүп келет, кыргызстандык студенттер 2016-жылдан баштап чакырылып, катышып жатышат. Жылдан-жылга катышуучулардын саны да өсүүдө. Фестивалда россиялык беделдүү ЖОЖдордон келген студенттер бар. Биздин Улуттук университеттен бул ирет алты студент барып, алты багыт боюнча тапшырмаларды аткарып, ар түрдүү орундарды багындырышты. Жалпысынан алганда бул биз үчүн абдан чоң сыймык. Анткени 30 жылдык тарыхы бар эгемен өлкөдө реклама жана PR багыты да жаңыдан гана колго алынып келе жатат. Мындай күчтүү аянтчаларга чыгуу биздин студенттердин келечекте мыкты адис болуп чыгуусуна өбөлгө түзөт", — деди Какишев.
Ал аталган фестивалдын алкагында ушул жылдын күз айларында мугалимдер да барып, ал жактагы кесиптештери менен тажрыйба алмашып келүүсү макулдашылганын кошумчалады.
