Молдалиев: Улуу Жеӊиш тарыхын бурмалоого жол бербеш керек
© Sputnik / Асель Сыдыкова
Жазылуу
Баткен жоокерлеринин республикалык комитетинин төрагасы, отставкадагы полковник Сатыбек Молдалиев мектептерде тарых жакшы окутулбай, мамлекет тарабынан СССР баатырларынын эстеликтери жетиштүү деӊгээлде каралбай жатканын белгиледи.
Союз ураган соӊ 1991-жылдан кийин Улуу Ата мекендик согуш, ага катышкан адамдар, баатырлар тууралуу маалыматтарды бурмалаганга аракет кылгандар болду. Өзгөчө батыш өлкөлөрүндө тарыхты кайра жазып, аны басып чыгарып мектептерге берип окуткан учурлар бар. Бул тууралуу Сатыбек Молдалиев Sputnik Кыргызстан радиосунун эфиринде маек куруп жатып айтып берди.
Молдалиев: Улуу Жеӊиш тарыхын бурмалоого жол бербеш керек
Анын билдиришинче, кыргыз тарыхчылары да тарыхты жазганда ката кетирип коюп жатат.
"Улуу Ата мекендик согушту совет бийлиги жеӊип чыкканы бул факт. Ошентсе да жогорудагы бурмаланган маалыматтар орус эли, анын ичинде биз тууралуу терс пикирди жаратууда. Бул окуя тарыхта алтын тамгалар менен жазылып калды. Улуу Жеӊишке жетиш үчүн ар бирибиздин ата-бабабыз жан үрөп салымын кошту. Кыргызстандагы ар бир үй-бүлөнүн бул окуяга тиешеси бар. Андыктан тарыхый окуянын бурмаланып, баатырлардын жасаган эрдигинен шек саноого, жаштардын тарыхты унутта калтыруусуна жол бербешибиз керек. Жаштарга Улуу Ата Мекендик согуш эмне үчүн чыккан, ким менен ким согушканы тууралуу маалымат жетиштүү берилбей жатат. Бирок аскер кызматкерлери, ветерандар аракет кылып, коомдук кыймыл түзүп бул кемчиликти толуктоого аракет кылып жатабыз. Биздин тарыхчылар да тарыхты жазганда ката кетирип коюп жатат. Мисалы, Үркүн тууралуу жазганда анча-мынча орус элине каршы маалымат жазылган экен. Буга кылдат мамиле жасалып абайлабаса терс көрүнүштөр болуп кетиши мүмкүн. Россия Кыргызстанга эӊ жакын мамлекет, эл деп айтсак болот. Учурда дээрлик миллиондогон жердешибиз ошол жакта эмгектенет. Алакабыз бекем. Түрдүү пикирлердин жаралышына мектептерде тарых жакшы окутулбай, мамлекет тарабынан Советтер Союзунун баатырларынын эстеликтери жетиштүү деӊгээлде каралбай, чөп басып кеткендиги себеп болууда. Чоӊдор мындай мамилени оӊдогондо гана балдардын Ата мекенге болгон сүйүүсүн, патриоттук сезимдерин ойготуп, келечекте мындай апаатка жол бербегенге тарбиялай алабыз ", — деди Молдалиев.
Ал "Өлбөс полкко" балдарды айдап чыгып, чоочун адамдардын сүрөтүн карматпай, мүмкүн болсо өз аталарынын портреттерин алып чыгышына шарт түзүш керектигин кошумчалады.
