Аймактагы жашоочулар электрондук коммерция боюнча окуудан өттү
© Sputnik / Асель Сыдыкова
Жазылуу
"Санарип инсан" долбоорунун менеджери Ажыбек Нурланов аталган долбоордун башкы максаты элдин санариптик сабаттуулугун жогорулатуу экенин айтты.
"Санарип инсан" долбоору Кыргызстандын аймагындагы калкы эң жыш жайгашкан 12 локацияда электрондук коммерция боюнча окутуусун жыйынтыктады. Социалдык тармак аркылуу алдын ала каттоо жүрүп, ага жалпы 250 киши катышты. Бул тууралуу Ажыбек Нурланов Sputnik Кыргызстан радиосунун эфиринде маек куруп жатып билдирди.
Аймактагы жашоочулар электрондук коммерция боюнча окуудан өттү
Анын айтымында, аталган долбоордун башкы максаты — калктын санариптик сабаттуулугун жогорулатуу.
"Катышуучулар билимин жогорулатып, электрондук коммерциянын артыкчылыгын, катталуу ыкмасын, продукциясын алдыга жылдырууну үйрөнүп, тренингдин аягында сертификаттар менен сыйланышты. Тренингдин алкагында аймактардагы катышуучулар товар же сунуштала турган кызматтарды фото, видео жана тексттин жардамы менен бүгүнкү күндөгү базар талабына ылайык презентациялоо, тексттик сыпаттамасын түзүү, жарнама, пост, макала, техникалык мүнөздөмөлөр үчүн тексттерди жазуу жана копирайтингдин сырларын үйрөнүштү. Ошондой эле мобилография боюнча практика жүзүндө видео жарыялоону, видеого тартууну, монтаждоо сырларын жана ага тиешелүү тиркемелер аркылуу электрондук аянтчаларга жайгаштырууну өздөштүрүштү. "Санарип инсан" долбоору жаштардын, кыз-келиндердин, мигранттардын жана алыскы аймактарда жашаган тургундардын санариптик сабаттуулугун жогорулатуу максатын көздөйт. Атап айтканда, санариптик платформаларды колдонууну, социалдык медианын функцияларын үйрөнүүнү, санарип финансылык колдонмолорду, онлайн коммерция жана ишкердик кылууда маалымат технологиясын колдонуу жана жашыл экономика аркылуу туруктуу өнүгүү жолдорун сунуш кылат. Биздин долбоор Экономика жана коммерция министрлигинин электрондук сооданы өнүктүрүү пландарына дал келет", — деди Нурланов.
Ал тренингдер БШК менен биргеликте "Жарандык жана санариптик билим берүү борборлорунда" өтүп, окутууларга региондордогу жаштар борборлору жана китепканалар дагы көмөк көрсөткөнүн кошумчалады.
