Декларация тапшырууну акыркы күнгө калтырбагыла! Салык кызматынын эскертүүсү
Жазылуу
Мал-мүлк тууралуу маалымат берүү мөөнөтү 1-майда аяктайт.
БИШКЕК, 22-апр. — Sputnik. Салык кызматы жарандарды жана жеке ишкерлерди декларация тапшырууну акыркы күнгө калтырбоого чакырды.
Мал-мүлк тууралуу маалымат берүү мөөнөтү 1-майда аяктайт.
"Практика көрсөткөндөй, салык декларациясын тапшырууну көбүнчө акыркы күнгө калтырышат. Бул салык органдарында кезектин көбөйүшүнө же маалыматтык системада ашыкча жүктүн пайда болушуна алып келиши мүмкүн. Ошондуктан бардык салык төлөөчүлөрдөн өз милдеттенмесин алдын ала аткарууну өтүнөбүз", — деп айтылат маалыматта.
Жеке ишкерлер декларацияны электрондук түрдө гана, ал эми жеке жактар электрондук же кагаз жүзүндө тапшырууну тандаса болот.
1-майга чейин салык декларациясын төмөнкүлөр бериши керек:
жеке ишкерлер, анын ичинде патент менен иштегендер;
менчигинде салык салынуучу мүлкү жана жер тилкеси (короо-жай участкаларынан башка) бар жеке жактар;
юридикалык жак болуп саналбаган дыйкан жана фермердик чарбалар;
илимий-изилдөө, чыгармачыл, окутуучулук, дарылоо-ден соолукту чыңдоочу жана аткаруу-тескөөчү иш-милдеттерге байланышпаган калкты тейлөө боюнча башка ишти жүзөгө ашырып жаткан мамлекеттик органдын же жергиликтүү өз алдынча башкаруу органынын карамагында турган мекеменин, уюмдун кызматкерлери;
мамлекеттик же муниципалдык кызматчы болуп саналбаган, мамлекеттик үлүшү бар уюмдардын жана ишканалардын кызматкерлери;
эл аралык уюмдардагы ишинен киреше алган, жашап турууга укугу же кайрылман статусу бар жарандар;
жыл ичинде 300 миң сомдон ашык суммадагы мүлк сатып алган жеке жак.
