Органикалык өндүрүш түшүнүгү кеңейтилип, мыйзамга киргизилди
© Sputnik / Асель Сыдыкова
Жазылуу
Органикалык айыл чарба департаментинин директору Сагынбек Турсуналиев "Органикалык өндүрүш жөнүндө" мыйзамынын кабыл алынган себебин айтып берди.
Органикалык өндүрүш түшүнүгү кеңейтилип, мыйзамга киргизилди. Бул тууралуу Сагынбек Турсуналиев Sputnik Кыргызстан радиосуна маек куруп жатып билдирди.
Органикалык өндүрүш түшүнүгү кеңейтилип, мыйзамга киргизилди
Анын айтымында, мыйзамда органика жаатындагы көзөмөлдү жакшыртуу каралган.
"Өлкөдө 2019-жылы "Органикалык айыл чарбасы жөнүндө" мыйзам кабыл алынган. Анда 14 берене камтылып, негизинен айыл чарбасына тиешелүү болуп калган. Бирок быйыл "Органикалык өндүрүш жөнүндө" мыйзам кабыл алынды. Бул мыйзамдын мурдагыдан айырмасы, органика жаатындагы өндүрүш түшүнүгү кеңейтилди. Маселен, мурдагыда малдын эти, сүтү органикалык болуп эсептелсе, азыр анын терисин, жүнүн кайра иштетүү дагы кошулду. Ошондой эле бал, балык, аквакультура органикалык деп киргизилүүдө. Ошондой эле багбанчылыкка да тиешелүү, мурда мөмөсү органикалык деп саналса, азыр анын жыгачынан жасалган буюмдар дагы камтылууда. Мына ушунун баары мыйзамга киргизилип, органика түшүнүгү кеңейтилди", — деди Турсуналиев.
Ошондой эле органикалык талаптарга жооп бере турган сертификат берүүчү эл аралык орган ачууга мүмкүндүк түзүлгөнүн кошумчалады.
